मिलान फेसन वीक: इटालियन र स्पानिस डिजाइनरको पोशाकमा र्याम्पमा उत्रिइन् प्रतिष्ठा राउत
प्रकाशित मिति : आश्विन १२, २०७८ मंगलबार
यूके निवासी नेपाली मूलकी मोडल प्रतिष्ठा राउत इटलीको मिलानमा आयोजित मिलान फेसन वीकमा इटालियन र स्पानिस डिजाइनरको पोशाकमा र्याम्पमा उत्रिएकी छिन् । राउत इटालियन डिजाइनर भ्यालेन्टिना पोल्ट्रोनियरी र स्पानिस डिजाइनर आना बेनभेनुतोको डिजाइनमा र्याम्पमा उत्रिएकी हुन् ।
राउतले इटालियन डिजाइनर भ्यालेन्टिनाको डिजाइनमा सेतो स्कर्ट र टिसर्ट तथा स्पानिस डिजाइनर आनाको हरियो ड्रेस पहिरिएकी थिइन् । उनलाई मेक अप गर्ने जिम्मा एकाडेमिया लिलियना पाडुयनो टिमले गरेको थियो । फेशन सप्ताह इभेन्ट साभोले आयोजना गरेको थियो ।
झन्डै दुई बर्षको अन्तरालपछि मिलानमा गत २१ देखि २७ सेप्टेम्बरसम्म मिलान फेसन वीक आयोजना गरिएको थिषे जहाँ सेलिब्रेटी, मोडल र मिडियाहरुको जमघट रहेको थियो । १६ औं शताब्दीदेखि विश्वकै फेसन राजधानीको उपाधि पाएको इटालीको मिलान आफ्नै लयमा फर्किने क्रममा फेसन सप्ताह आयोजना गरिएको हो ।
‘फेसनको राजधानी पुगेर क्याटवाक गर्ने सपना पुरा भयो’ उनले सुनाइन्, ‘विश्वका कयौँ सेलिब्रेटी मोडलहरुसंगै सहभागी हुन पाउंदा धेरै सिकें ।’
आउँदो १६ अक्टोबर हुने ‘मिस यूनिभर्स ग्रेट ब्रिटेन’ की फाइनलिस्ट प्रतिष्ठा बेलायत अल्डरसटनिवासी हुन् । उनी मिस इंग्ल्याण्ड २०१९ मा सेकेन्ड रनरअप हुन सफल भएकी थिइन् । हङकङमा जन्मिएर ५ वर्षको उमेरदेखि बेलायत बस्ने प्रतिष्ठा १६ वर्षमै मोडलिङ थालेको बताउँछिन् ।
युनिभर्सिटी अफ ब्राइटनबाट इन्टेरियर आर्किटेक्चरमा ब्याचलर उत्तीर्ण प्रतिष्ठा पेशाले ‘प्लोर प्लान आर्किटेक्ट’ हुन् ।