बेलायतसमक्ष नेपालमा अक्सिजन सहयोगको आग्रह गर्दै हस्ताक्षर अभियान, हस्ताक्षरकर्तामा सिलेब्रेटीहरु
प्रकाशित मिति : जेष्ठ ५, २०७८ बुधबार
बेलायत सरकारसमक्ष नेपालमा अक्सिजन लगायत अत्यावश्यक सामग्री उपलब्ध गराउन माग गर्दै हस्ताक्षर अभियान सुरु गरिएको छ । उक्त अभियानमा विभिन्न क्षेत्रका चर्चित व्यक्तित्वहरुसहित बेलायती सिलेब्रेटीहरु समेतले हस्ताक्षर गरेका छन् ।
कलाकारहरु एडजोआ एन्डोह, जोआना लुम्ले, अमृता अचारिया लगायत बेलायती वैज्ञानिक, प्राज्ञिक व्यक्तित्व, आरोही, गोर्खा र नेपालका शुभचिन्तकहरुले नेपाललाई अक्सिजन उपलब्ध गराउन बेलायती विदेश मन्त्री डोमिनिक राबसमक्ष आग्रह गर्दै हस्ताक्षर गरेका छन् । कोभिड १९ का कारण स्वास्थ्य संकट झेलिरहेको नेपालमा अक्सिजनसहित आपतकालिन औषधि सहयोग गर्न समेत माग गरिएको छ ।
तपाईपनि यो अभियानमा सहभागी हुँदै हस्ताक्षर गर्न चाहनुहुन्छ भने यहाँ क्लीक गर्नुहोला ।
हस्ताक्षरकर्तामा सर माइकल पालिन, सर क्रिस बोनिंगटन, ब्रिटिश जनस्वास्थ्य विज्ञ तथा खोप अनुसन्धाता सर जेरेमी फरार, सराह गिल्बर्ट, एन्ड्रियू पोलार्ड, निकोलस हवाइट, एड्रियन हिल, पिटर होर्बी, फिलिप गुरिन, एलेन टाउनसेन्ड, स्याण्डी डगलस, पांच जिवित भिसी विजेतामध्ये एक क्याप्टेन रामबहादुर लिम्बु समेत छन् । चेन्ज डट ओर्गमार्फत सुरु गरिएको हस्ताक्षर अभियान कोभिड एलाइन्स फर नेपाल युकेले सुरुवात गरेको हो ।
पर्वतारोही, ब्रोडकास्टर्स, फिल्म निर्माता, सैनिक, लेखक र प्राध्यापकहरु पनि अभियानमा जोडिएका छन् । हस्ताक्षरकर्ताहरुले ब्रिटिश सरकारलाई तत्काल अतिआवश्यक अक्सिजन सामग्री र अन्य औषधि सहयोग गर्न अपिल गरेका छन् ।
“बेलायत र नेपालबीच शताब्दीऔं लामो पृथक र पुरानो सम्बन्ध छ । हामी पुरानो मित्रराष्ट्रको दुःखमा एकसाथ हुने बेला आएको छ,” पत्रमा भनिएको छ ।
सर क्रिस बोनिङटनले भनेका छन्, “म आफैंले देखेको छु कि नेपालको पहाडी भेगबाट आएका नेपालीले ब्रिटेनका लागि वर्षौंदेखि कति योगदान गरेका छन् भनेर । मलाई आशा छ नेपालीको दुःखमा बेलायत सरकारले सहयोग गर्ने छ ।”