उपत्यकामा निषेधाज्ञा जेठ १३ गतेसम्म थप, पार्टी प्यालेसमा समेत कार्यक्रम गर्न नपाइने
प्रकाशित मिति : बैशाख २८, २०७८ मंगलबार
काठमाण्डौं उपत्यकामा जारी निषेधाज्ञा जेठ १३ गतेसम्म थप गरिएको छ । जिल्ला प्रशासन कार्यालय काठमाण्डौंका अनुशार नेपालमा कोरोनाभाइरस सङ्क्रमणको जोखिम बढ्दै गएको अवस्थामा आगामी दुई सातासम्म निषेधाज्ञा थप गरिएको हो ।
बिहिबारदेखि लागु हुनेगरी निषेधाज्ञामा विवाह, व्रतबन्धजस्ता कार्यक्रमहरू होटल वा पार्टी प्यालेसमा समेत गर्न नपाइने भएको छ । तर खाद्य सामाग्रीहरुका लागि स्टोरहरु भने विहान ७ बजेदेखि १० बजेसम्म खोल्न पाइने भएको छ ।
निषेधाज्ञामा उपत्यकाभित्र अत्यावश्यकबाहेकका सम्पूर्ण कार्यालय बन्द गर्ने र नीजि निर्माणका सामाग्री लिन प्रयोग गर्ने सवारी साधन पनि चलाउन नपाइने काठमाडौँ जिल्ला प्रशासन कार्यालयका प्रमुख कालीप्रसाद पराजुलीले बताए ।
कोरोनाभाइरस सङ्क्रमण रोकथामका लागि भन्दै काठमाडौं उपत्यकामा १५ दिन निषेधाज्ञा थप गर्न जिल्ला कोभिड सङ्कट व्यवस्थापन केन्द्र डीसीसीएमसीले सोमवार सिफारिस गरेको थियो। उक्त सिफारिस लगत्तै निषेधाज्ञा थपको निर्णय गरिएको हो ।
कोरोनाभाइरस सङ्क्रमण फैलिने गति तीव्र हुँदै गएपछि गत वैशाख १६ गते एक हप्ताका लागि निषेधाज्ञा लगाइएको थियो। पछि त्यसलाई कडा बनाउँदै एक हप्ता थपेर वैशाख मसान्तसम्मका लागि बढाइएको थियो।