स्वास्थ्य मन्त्रालयको अपिल : अस्पतालमा शय्या छैनन्, संवेदनशील बनिदिनुस्
प्रकाशित मिति : बैशाख १७, २०७८ शुक्रबार
स्वास्थ्य मन्त्रालयले कोरोना संक्रमण फैलने दर डरलाग्दो रुपमा बढिरहेको र अस्पतालमा राखेर हेरचाह गर्न शय्या उपलब्ध गराउन नसकिने अवस्था भइसकेको जनाएको छ।
मन्त्रालयले शुक्रबार सर्वसाधारणमा अपिल जारी गर्दै देशको स्वास्थ्य प्रणालीले थेग्नै नसक्ने गरी संक्रमण फैलिइरहेकाले सबै जना संवेदनशील बनिदिन आग्रह गरेको छ।
मोरङ, सुनसरी, झापा, पर्सा, बारा, धनुषा, काठमाडौं, भक्तपुर, ललितपुर, चितवन, मकवानपुर, काभ्रे, कास्की, दाङ, बाँके, रुपन्देही, पाल्पा, बर्दिया, कपिलवस्तु, सुर्खेत, कैलाली र कञ्चनपुरमा संक्रमण डरलाग्दो गरी फैलिइरहेको मन्त्रालयले जनाएको छ।
संक्रमणको रोकथाममा जनस्वास्थ्यका मापदण्डहरु (मास्क लगाउने, भौतिक दुरी कायम गर्ने, बेलाबेलामा साबुनपानीले हात धुने) नै उत्तम उपाय भएको उल्लेख गर्दै मन्त्रालयले कुनै पनि मार्गबाट देशविदेश जाने आउने वा आन्तरिक बाह्य पर्यटनका लागि कहीँ कतै जाने काम पूर्ण रुपमा नगर्न नगराउन, सार्वजनिक स्थलमा भीडभाड गर्ने काम बन्द गराउन अत्यन्त जरुरी रहेको जनाएको छ।