विभूषणमा नेपालको नक्सा विवादबारे बाेल्याे गृह मन्त्रालय
प्रकाशित मिति : चैत्र २८, २०७७ शनिबार
राष्ट्रपति विद्यादेवी भण्डारीले शुक्रबार विभिन्न व्यक्तिलाई वितरण गरेको विभुषण एकाएक विवादमा पर्यो। कारण थियो–विभूषणमा अंकित नेपालको नक्सामा कालापानी, लिम्पियाधुरा नसमेटिनु।
विभूषण सार्वजनिक हुनेबित्तिकै ‘नयाँ नेपाल खोई’ भन्दै सामाजिक सञ्जालमा राष्ट्रपति र सरकारको व्यापक आलोचना भयो। खासगरी संविधानका संरक्षक राष्ट्रपतिले संविधानलाई नै मिच्ने काम गरेको भनी आलोचना भयो।
संविधानको धारा (९२) मा ‘नेपालको निसाना छाप अनुसूची ३ मा उल्लेख भएबमोजिम हुनेछ’ भनिएको छ। सरकारले लिम्पियाधुरासम्मकै भूभाग समेटेर गत जेठमा जारी गरेको नक्साअनुसार गत असार ४ मा संविधानको अनुसूची ३ संशोधन गरिएको छ।
संविधानको संरक्षक राष्ट्रपति हुन्। तर राष्ट्रपतिबाट वितरण गरिएको विभूषणमा नेपालको नक्सा पूर्ण रुपमा नभएको पाइएको हो।
एमालेको माधव नेपाल समूहको युवासंघले माइतीघर मण्डलामा विरोध प्रदर्शन नै गर्यो। प्रदर्शनकारीहरुले ‘लिपुलेक र कालापानीसहितको चुच्चे नक्सा खोई?’, ‘नेपालको पूर्ण नक्सा (चुच्चे) को प्रयोग सुनिश्चित गर’ लगायत लेखिएका ब्यानर तथा प्लेकार्ड लिएर सरकारविरुद्ध नाराबाजी गरेका थिए।
बाेल्याे गृह
व्यापक रुपमा सरकारको आलोचना भए पछि गृह मन्त्रालयले नेपालको वर्तमान राजनीतिक तथा प्रशासनिक नक्सा लागू हुनुअघि घोषणा भई कोभिड–१९ का कारण वितरण हुन नसकेको विभूषणमात्रै यसपटक सुशोभन गरिएको भन्दै स्पष्ट पारेको छ ।
सुशोभन भएको विभूषणमा अङ्कित नेपालको नक्साका सम्बन्धमा केही सञ्चारमाध्यममा आएको समाचारप्रति गम्भीर ध्यानाकर्षण भएको जनाउँदै मन्त्रालयले घोषणाको तयारी र वितरणको प्रस्तावित समय रहेका बेलाको नेपालको आधिकारिक नक्सा नै विभूषणमा अङ्कित भएको मन्त्रालयले जनाएको छ।
राष्ट्रिय जीवनका विभिन्न क्षेत्रमा उल्लेखनीय योगदान पुर्याउने व्यक्तिलाई २०७६ असोज ३ गते संविधान दिवसका अवसरमा घोषणा भई २०७७ वैशाख १ मा वितरणको लागि तयारी गरिएको भए पनि कोभिड–१९ का कारण २०७७ वैशाख १ मा वितरण हुन सम्भव नभएकाले हालै मात्र उक्त सुशोभन भएको मन्त्रालयले एक विज्ञप्ति जारी गरी जनाएको छ।
नेपालको वर्तमान राजनीतिक तथा प्रशासनिक नक्सा लागू भएपछि घोषणा भएका विभूषणमा सोहीबमोजिमको नक्सा अङ्कित भएको र यसको सुशोभन आगामी वैशाख १ गते गरिने पनि मन्त्रालयले जनाएको छ।