सरकारबाट समर्थन फिर्ता लिने तयारीमा माओवादी
प्रकाशित मिति : चैत्र १८, २०७७ बुधबार
नेकपा माओवादी केन्द्रले सरकारलाई दिएको समर्थन फिर्ता लिने भएको छ। समर्थन फिर्ता लिने विषयमा छलफल गर्न माओवादी केन्द्रले विहीबार स्थायी कमिटी बैठक बोलाएको छ।
बैठकले सरकारबाट समर्थन फिर्ता लिने निर्णय हुनसक्ने एक नेताले जनाएका छन्। गत शनिबार नागरिक अगुवाहरूले प्रज्ञा डबलीमा आयोजना गरेको कार्यक्रममा पनि माओवादी केन्द्रका अध्यक्ष पुष्पकमल दाहाल ‘प्रचण्ड’ ले सरकारबाट समर्थन फिर्ता लिने संकेत गरेका थिए।
‘नैतिकता र राजनीतिक हिसाबले पनि अब धेरै दिन रूक्न सकिन्न,’ प्रचण्डले भनेका थिए,‘मुलुकको राजनीति जतासुकै जाओस् चाँडै सरकारबाट समर्थन फिर्ता हुन्छ।’
चैत २३ भित्र सरकारले विश्वासको मत लिनुपर्छ : देव गुरुङ
माओवादीका प्रमुख सचेतक देव गुरुङले पनि आगामी २३ गतेभित्र सरकारले संसदमा विश्वासको मत लिनुपर्ने बताएका छन्।
बुधबार प्रतिनिधिसभाको बैठकमा बोल्दै गुरुङले सर्वोच्चको पछिल्लो फैसलापछि संविधानको धारा ७६ ९२० आकर्षित हुने भएकोले फैसला भएको ३० दिनभित्र सरकारले विश्वासको मत लिनुपर्ने जिकिर गरेका थिए।
सरकारले चैत २३ भित्र विश्वासको मत नलिए सरकारमाथि संवैधानिक प्रश्न उठ्ने उनको भनाइ छ।
‘सर्वोच्चले संसद पुनःस्थापना गरेको छ तर सरकारलाई पुनःस्थापना गरेको छैन। सरकार विधि मिचेर अगाडि बढिरहेको छ,’ गुरुङले भने, ‘स्वाभाविक ढंगले कामचलाउ भइसकेको सरकार परिवर्तन गर्ने प्रक्रिया तत्काल सुरू हुनुपर्छ।’