अमेरिकाका लागि नवनियुक्त नेपाली राजदुत डा. खतिवडालाई वासिंटन डिसीमा स्वागत
प्रकाशित मिति : माघ २४, २०७७ शनिबार
अमेरिकाका लागि नवनियुक्त नेपाली राजदुत डाक्टर युवराज खतिवडा अमेरिका आइपुग्नुभएको छ । आज कतार एयरलाइन्समार्फत दिउसो २ बजेर ४५ मिनेटमा उहाँ वासिंटन डिसी आइपुग्नुभएको हो ।
वासिंटन डिसीमा रहेको नेपाली दूतावासका तर्फबाट डेपुटी चिफ अफ मिसन कुमार खरेल लगायतको टिम खतिवडालाई विमानस्थलमा स्वागत गर्न पुगेको थियो ।
स्वागतका लागि विमानस्थलमा पुग्नुभएका अवैतनिक महावाणिज्यदूत प्रेमराजा महतले राजदूत खतिवडालाई कार्यकाल सफलताको शुभकामना दिनुभयो ।
पूर्वराजदूत डाक्टर अर्जुनबहादुर कार्की हिजो बेलुका कतार एयरवेजमार्फत नै नेपाल फर्किसक्नुभएको छ । झण्डै ५ बर्ष अगाडि राजदूतका रुपमा अमेरिका आएका कार्की कार्यकाल सकिएपछि पनि नयाँ राजदूतको नियुक्तीमा भएको ढिलाई कारण अमेरिकामा नै बस्नुपरेको थियो ।
राजदुत खतिवडा नेपाली अर्थविद् तथा नेपालका पूर्व अर्थमन्त्री हुनुहुन्छ । उहाँ नेपाल राष्ट्र बैङ्कको पन्ध्रौँ गभर्नर हुनुहुन्थ्यो । उहाँले कोलम्बोमा यूएनडीपी रिजनल सेन्टरमा तीन वर्ष अर्थशास्त्रीको रूपमा काम गर्नुभएको थियो ।
युवराज खतिवडा बिक्रम सम्बत २०५९ देखि २०६२ सम्म नेपाल सरकारको राष्ट्रिय योजना आयोगमा उपाध्यक्ष हुनुभएको थियो ।
उहाँ ओली मन्त्रिमण्डलका अर्थमन्त्री हुनुहुन्थ्यो । गोकुल बाँस्कोटाले राजिनामा दिएपछि उहाँले सुचना तथा सञ्चार प्रविधि मन्त्रीको समेत काम गर्नुभएको थियो ।