मेरिल्याण्ड राज्य संसदमा ह्यारी भण्डारीको पुन: उम्मेदबारी, भर्चुअल फण्डरेजमा आजै २९ हजार ५ सय

खसोखास अमेरिका ब्यूरो

---

प्रकाशित मिति : मंसिर ७, २०७७ आईतबार

(यो समाचार संकलित रकमको अपडेटसहित सम्पादन गरिएको छ ।-  सम्पादक)

मेरिल्याण्ड राज्य संसदमा पुन:  उम्मेदबारीको घोषणा गर्नुभएका नेपाली अमेरिका ह्यारी भण्डारीको भर्चुअल फण्डरेज कार्यक्रममा आज २९ हजार ५ सय डलर संकलन भएको छ । अमेरिकामा रहेका नेपालीहरुका तर्फबाट यो सहयोग प्राप्त भएको हो ।

सन् २०१८ मा भएको निर्वाचनमा भण्डारी मेरिल्याण्ड राज्य संसदको हाउस अफ डेलिगेट्समा डिस्ट्रिक्ट ८ बाट निर्वाचित हुनुभएको थियो । भण्डारी अमेरिकामा अहिलेसम्मकै सबैभन्दा उच्च तहमा निर्वाचित हुने नेपाली मुलको जनप्रतिनिधि हुनुहुन्छ । उहाँले सोही पदका लागि सन् २०२२ को चुनावका लागि पुन: उम्मेदबारीको घोषणा गर्नुभएको हो ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

विगतमा आफू निर्वाचित हुनका लागि अमेरिकाका नेपाली समुदायका तर्फबाट प्राप्त सहयोगको स्मरण गर्दै उहाँले आगामी निर्वाचनका लागि पनि सहयोग प्राप्त हुने आशा व्यक्त गर्नुभयो । अमेरिकी राजनीतिमा अगाडि बढ्न चाहने सबैलाई नेपाली समुदायका तर्फबाट सहयोग गर्न आव्हान गर्दै उहाँले मुलधारको अमेरिकी राजनीतिमा अगाडि बढ्नका लागि नेपाली अमेरिकन समुदायलाई प्रोत्साहन समेत गर्नुभयो ।

ह्यारी भण्डारीको चुनावी अभियानमा सहयोग गर्न चाहनुहुन्छ भने यहाँ क्लीक गर्नुहोला ।

नेपालमा नै सरकारी स्कुल र सरकारी विश्वविद्यालयमा पढेर केही बर्ष अगाडिमात्र अमेरिका आउनुभएका भण्डारीले गाउँको सरकारी स्कुलबाटै एसएलसी पास गर्नुभएको थियो । उहाँले अंग्रेजी साहित्यमा त्रिभुवन विश्वविद्यालयबाट मास्टर्स डिग्री गर्नुभयो ।

काठमाडौंमा दुईवटा प्राइभेट स्कुलमा प्रिन्सिपल समेत भएर काम गर्नुभएका भण्डारी सन् सन् २००५ मा अमेरिका आउनुभएको हो । २०११ मा अमेरिकन नागरिक बन्नुभएका ह्यारीले नेपालमा १३ वर्ष शिक्षक पेशाको अनुभव सहित अमेरिकामा पनि अध्यापन पेशा नै रोज्नुभएको थियो ।

अमेरिकी राजनीतिमा प्रवेश गरेपछि उहाँले राजनीतिक क्षेत्रमा इमान्दारीता र आफ्नो क्षमतालाई राम्रोसँग प्रस्तुत गर्न सफल हुनुभयो । जसको कारण उहाँले राज्यसंसदको लागि टिकट पाउनुभयो । पहिलोपटक पराजित हुनुभएका ह्यारी सन् २०१८ मा चुनाव जितेर इतिहास कायम गर्न सफल हुनुभयो ।

भण्डारी भन्नुहुन्छ – ‘अमेरिकी राजनीतिमा नेपाली अमेरिकन आउनु भनेको घनघस्याको उक्कालो चढ्नु जस्तै हो । इमानको भारी बोकेर नम्बे डिग्रीको ठाडो उक्कालोमा चढ्दा एकदमै थकाई लाग्छ, बीचबीचमा त बोकेको भारी पल्टाई दिउँ जस्तो लाग्छ । तर, उद्द्श्य के हो भन्ने मुख्य हुन आउँछ ।’

ह्यारीले संसदभित्र हिन्दु धर्मग्रन्थ वेदलाई साक्षी राखेर सपथ लिनुभएको थियो । उहाँले वेद धर्मशास्त्र मात्र नभएर शिक्षा, प्रतिवद्धता, आत्मविश्वास पनि भएकाले आफूले बेदलाई साक्षी राखेर सपथ लिएको बताउनुभयो ।