चीनसँग सम्झौता गर्न महरा बेइजिङ जाने
प्रकाशित मिति : बैशाख १६, २०७४ शनिबार
चीनसँग ‘वान बेल्ट वान रोड’ परियोजनामा सम्झौता गर्न उपप्रधान तथा अर्थमन्त्री कृष्णबहादुर महरा बेइजिङ जाने जनाईएको छ ।
प्रधानमन्त्री पुष्पकमल दाहाल ‘प्रचण्ड’ ले अघिल्लो महिना चीन भ्रमणको क्रममा जनाएको प्रतिवद्धता अनुसार बेइजिङमा वान बेल्ट वान रोड ओबर सम्बन्धी अन्तर्राष्ट्रिय सम्मेलनअघि नै नेपालले चीनसँग सम्झौता गर्ने तयारी गरिएको जनाईएको हो ।
चीनले बेइजिङमा मे १४ र १५ मा ओबर सम्बन्धी पहिलो अन्तर्राष्ट्रिय सम्मेलन आयोजना गर्दैछ, जसमा नेपालबाट सूचना तथा सञ्चारमन्त्री सुरेन्द्रकुमार कार्की सहित परराष्ट्र, भौतिक योजना तथा निर्माण र वाणिज्य मन्त्रीलाई निमन्त्रणा गरिएको छ।
सूचना तथा सञ्चारमन्त्री कार्कीका अनुसार तर ढिलोगरी ओबरमा नेपाल र चीनबीच सम्झौता गर्ने गरी उपप्रधानमन्त्री महराको नेतृत्वमा नेपाली प्रतिनिधिमण्डल बेइजिङ जाने तयारी भएको र त्यही अनुसार चीनलाई जानकारी दिइएको जनाईएको हो ।
‘उपप्रधानमन्त्री महराको नेतृत्वमा बेइजिङ जाने टोलीले चीनसँग ओबरमा सम्झौता गर्ने तयारी भइरहेको छ भने बिहिबार ‘शुक्रबारसम्म बेइजिङ सम्मेलनमा सहभागी हुन आफ्नो नाम दर्ता गराउनु पर्ने भएकाले आज साँझसम्म यस सम्बन्धी निर्णय हुने जनाईएको हो ।
चीनसँग ओबर सम्झौता र सम्मेलनमा सहभागिता सम्बन्धी सम्पूर्ण तयारी परराष्ट्र मन्त्रालयले गरिरहेको कार्कीले बताए।
प्रधानमन्त्री दाहालको विशेष दूतका रुपमा करिब साढे आठ महिनाअघि उपप्रम महराले बेइजिङ पुगेर चीनका प्रधानमन्त्री ली खछ्याङ र परराष्ट्रमन्त्री वाङ यीसँग भेटवार्ता गरेका थिए। महरा अहिले प्रधानमन्त्री दाहालकै आग्रहमा ओबरमा सम्झौता गर्ने गरी बेइजिङ जान लागेका हुन्। प्रधानमन्त्रीका प्रेस सल्लाहकार गोविन्द आचार्य भन्छन्, ‘सम्झौता नै गर्ने गरी उपप्रधानमन्त्री महरा चीन जाने तयारी भइरहेको छ।’
‘सम्मेलनका दुई पक्ष छन्, एउटा त्यसमा सहभागी भएर छलफल गर्ने, अर्को औपचारिक रुपमा ओबर परियोजनामा हस्ताक्षर गर्ने,’ सरकारका प्रवक्ता समेत रहेका मन्त्री कार्कीले भने, ‘अहिले ती दुवै पक्षमा सरकारले तयारी गरिरहेको जनाइएको छ ।