मार्चमा मात्र २० जना नेपालीलाई अमेरिकाबाट देशनिकालाको आदेश, १४१ बिरुद्ध मुद्दा
प्रकाशित मिति : बैशाख ११, २०७४ सोमबार
– किशोर पन्थी
मार्च महिनामामात्र अमेरिकाबाट २० जना नेपालीहरुले देशनिकालाको आदेश पाएको तथ्यांक खसोखास साप्ताहिकले प्राप्त गरेको छ । एक्जुकेटिभ अफिस फर इमिग्रेशन रिभ्युको तथ्यांक अनुशार ट्रम्प कार्यकाल सुरु भइसकेपछि फरबरीमा ८ जना र मार्चमा २० जना नेपालीहरुले अमेरिकी अदालतबाट देशनिकालाको आदेश पाएका छन् ।
यसअगाडि आर्थिक बर्ष २०१७ को ओबामा कार्यकालको पहिलो ४ महिनामा २३ जना नेपालीहरुलेमात्र अमेरिकी अदालतबाट देशनिकालाको आदेश पाएका थिए । ओबामा कार्यकालको ४ महिनाको तुलनामा ट्रम्प कार्यकालको २ महिनामा अमेरिकाबाट देशनिकालाको आदेश पाउने नेपालीहरु धेरै रहेका छन् ।
नेपालमा गएको विनाशकारी भूकम्पपछि अमेरिकामा रहेका नेपालीहरुले टीपीएस प्राप्त गरेपछि विगत २ बर्षमा अमेरिकाबाट देशनिकालाको आदेश पाउने नेपालीहरुको संख्या हवात्तै घटेको थियो भने गत आर्थिक बर्षमा अमेरिकाबाट देशनिकालाको आदेश पाउने नेपालीहरुको संख्या विगत १२ बर्ष यताकै कम रहेको थियो ।
मार्च महिनामामात्र १४१ जना नेपालीहरुलाई देशनिकालालागि अमेरिकी अध्यागमन अदालतमा मुद्दा दायर गरिएको छ । फरबरीमा १११ जना नेपालीबिरुद्ध अध्यागमन अदालतमा देशनिकालाका लागि मुद्दा दायर गरिएको थियो ।
आर्थिक बर्ष सन् २०१७ मा ओबामा कार्यकालमा ४ महिनामा २१८ जना नेपालीहरुलाई देशनिकालाका लागि अदालतमा मुद्दा दायर गरिएको थियो भने ट्रम्प कार्यकालका २ महिनामा मात्र २५२ जना नेपालीहरुबिरुद्ध देशनिकालाका लागि अदालतमा मुद्दा दायर गरिएको छ ।
आर्थिक बर्ष २०१७ को ६ महिनामा देशनिकालाका अदालतमा मुद्दा चलाइएका नेपालीहरुमध्ये ६ जना अपराधमा संलग्नहरु थिए । यही ६ महिनाको अवधिमा अपराध गरेका कारण देशनिकालाको आदेश पाउने नेपालीहरु ४ जना रहेका छन् ।