विगत १४ दिनमा युरोप यात्रा गरेका थप भिसावाहकलाई अमेरिका आउन छुट
प्रकाशित मिति : श्रावण २, २०७७ शुक्रबार
अमेरिकी विदेश मन्त्रालयले एक सुचना जारी गरेर विगत विगत १४ दिनमा युरोपको शेंगेन क्षेत्र, बेलायत र आयरल्याण्डको यात्रा गरेका विद्यार्थी भिसा भएकाहरुलाई अमेरिका आउन छुट दिइने जनाएको छ । एफ भिसाका अतिरिक्त एम र जे भिसा वाहकलाई पनि छट दिइएको छ ।
एम भिसा वाहकले भने अमेरिका आउनु अगाडि अमेरिकी कन्सुलेटबाट नेशनल भिसा वेभर लिनुपर्ने जनाइएको छ । त्यस्तै विजनेश यात्राका लागि विद्युतीय प्रणालीबाट यात्रा अनुमति लिइसकेकाहरुलाई पनि अमेरिका आउन छुट दिइएको छ । ईवान ,ईटु भिसामा आउने सन्धी ब्यापारी वा लगानीकर्तालाई पनि अमेरिका आउन छुट दिइएको छ ।
यसैबर्षको मार्च महिनामा ट्रम्प प्रशासनले कोरोनाको महामारी फैलिनबाट रोक्न युरोपको शेंगेन क्षेत्र, बेलायत र आयरल्याण्डबाट अमेरिका आउनमा रोक लगाएको थियो । उक्त रोक अहिलेसम्म पनि कार्यान्वयनमा नै रहेको छ । तर विद्यार्थी लगायतलाई अमेरिका आउनमा छुट दिएर उक्त रोकलाई केही खुकुलो पारिएको छ ।
यसैबीच अमेरिकी विदेशमन्त्रालयले एक सुचना जारी गरेर डिभी लोटरी २०२० का सन्दर्भमा स्पष्ट पारेको छ । आज जारी सुचनामा राष्ट्रपतिको घोषणाले डाइभर्सिटी भिसा जारी गर्नमा समेत रोक लगाएको उल्लेख गर्दै गत अप्रिल २३ सम्म भिसा जारी नभएका डिभी २०२० का आवेदकको भिसा जारी नहुने स्पष्ट पारेको छ ।
अमेरिकी विदेश मन्त्रालयले भिसाका लागि कसकसलाई छुट दिइनेछ भन्नेबारे थप स्पष्ट समेत पारेको छ । आवेदकहरु जो उनीहरुको आप्रवासी भिसा श्रेणी राष्ट्रपतिको कार्यकारी आदेश समाप्त हुनुअगाडि अर्थात् त्यसपछिको दुईहप्ताभित्र एजआउट हुने अवस्थामा छ, उनीहरुका लागि आप्रवासी भिसा जारी गरिने अमेरिकी विदेश मन्त्रालयले स्पष्ट पारेको छ । अर्थात् जसको आप्रवासी भिसा श्रेणी सन् २०२१ को जनवरी १५ अगाडि नै एजआउट हुँदैछ, उनीहरुले भिसा पाउनेछन् ।
त्यस्तै अमेरिकाको विदेश नीतिको उद्देश्य अनुरुप वा अमेरिकी सरकारको अनुरोधमा अमेरिकामा कामका लागि आउन लागेका कामदार भिसा एच र जेका निश्चित आवेदकलाई पनि भिसामा छुट दिइनेछ । कोरोना १९ सम्बन्धि कामका लागि आउन लागेकाहरुलाई कामदार भिसामा छुट दिइने अमेरिकी विदेशमन्त्रालयले जनाएको छ ।
पहिले नै फर्म स्वीकृत गरिसकिएका एच, जे, र एल भिसा आवेदकका दम्पत्ति र छोराछोरीहरुलाई पनि भिसामा छुट दिइने अमेरिकी विदेश मन्त्रालयले जनाएको छ । पहिले नै फर्म स्वीकृत भइसकेका अन्य निश्चित प्रकारका भिसा वाहकका दम्पत्ति र छोराछोरीहरुका लागि पनि भिसामा छुट दिइने भएको छ । तर अरु कुन कुन भिसा भन्नेबारे स्पष्ट पारिएको छैन ।
मुख्य आवेदक पहिले नै अमेरिकामा रहेकाहरुका वा अन्य सबै हिसाबले योग्य रहेका आफन्तहरुलाई एच, एल र जे श्रेणीका भिसा जारी गरिने पनि अमेरिकी विदेशमन्त्रालयको सुचनामा उल्लेख छ । तर राष्ट्रपतिको कार्यकारी आदेशको सबैभन्दा ठूलो मार भने डिभी विजेताहरुलाई पर्ने भएको छ । अन्य भिसा श्रेणीका व्यक्तिले डिसेम्बरपछि भएपनि भिसा पाउन सक्नेछन् तर डिभी २०२० का विजेताहरुले आगामी सेप्टेम्बरभित्र भिसा नपाउँदा डिभीका औचित्य समाप्त हुनेछ ।