न्युयोर्कमा ४ महिनाको भाडाको हिस्सा राज्य सरकारले तिर्ने कार्यक्रमबारे १६ प्रश्नोत्तर
कम आम्दानी हुने न्युयोर्कबासीहरुको ४ महिनाको भाडाको हिस्सा न्युयोर्क राज्य सरकारले तिरिदिने भएको छ । न्युयोर्क राज्यको भाडा सहायता कार्यक्रम अन्तरगत कोरोनाको महामारीबाट प्रभावितहरुका लागि यो कार्यक्रम ल्याइएको हो । कोरोनाको महामारीपछि आम्दानी गुमाएका भाडावालहरु यो कार्यक्रमका लागि योग्य हुनेछन् भने यो कार्यक्रम अन्तरगत योग्य भाडावाललाई एकपटकको रेन्टल सब्सीडी प्रदान गरिनेछ । उक्त रकम सिधै घरवेटीलाई पठाइने छ भने उक्त रकम आवेदकले राज्य सरकारलाई पुन तिर्नु नपर्ने जनाइएको छ । यो कार्यक्रमबारे थप स्पष्ट पार्न १६ प्रश्नोत्तर खसोखासका पाठकका लागि ।
के भाडा सहायता कार्यक्रम अन्तरगत पहिले जस्ले आवेदन दिन्छ, उसैले सुरुमा पाउने हो ?
कोभिड भाडा सहायता कार्यक्रम पहिलो आवेदकलाई पहिलो प्राथमिकताको आधारमा छैन । आवेदनहरु जुलाई १६ पछिको दुईसाताको अवधिभर प्राप्त गरिनेछ । होम एण्ड कम्युनिटी रिन्युवलले सबैभन्दा ठूलो आर्थिक र सामुदायिक सहायता आवश्यक भएको आधारमा योग्य आवेदकलाई प्राथमिकता दिनेछ । आय, भाडाको भार, गुमाएको आम्दानी र घरवारविहिन हुने खतरा लगायतका आधारमा आवेदनले प्राथमिकता पाउनेछन् ।
अनलाइनबाट आवेदन कसरी दिन सकिन्छ ?
अनलाइन आवेदन दिनका लागि हरेक आवेदकले अनलाइन एकाउन्ट बनाउन जरुरी हुन्छ । आवेदन दिने बेलामा तपाईलाई अनलाइन एकाउन्ट बनाउनका लागि तरिकाहरु सिकाइन्छ ।
कोभिड भाडा सहायता कार्यक्रम कस्तो कार्यक्रम हो ?
यो कार्यक्रम न्युयोर्क राज्यको व्यवस्थापिकाले स्थापना गरेको कार्यक्रम हो । कोरोनाको महामारीका कारण आम्दानी गुमाएका र भाडा तिर्ने भार परेकाहरुलाई सहायताका लागि यो कार्यक्रम ल्याइएको हो ।
बेरोजगारी बिमा, महामारी बेरोजगारी सहायता वा महामारी बेरोजगारी क्षतिपूर्तिलाई आम्दानीका रुपमा गणना गरिनेछ ?
हो । बेरोजगारी बिमा, महामारी बेरोजगारी सहायता वा महामारी बेरोजगारी क्षतिपूर्तिलाई आम्दानीका रुपमा गणना गरिनेछ ।
कोभिड भाडा सहायता कार्यक्रमका लागि को योग्य हुनेछ ?
यो सहायताका लागि योग्य हुनका लागि आवेदन न्युयोर्कबासी हुनुपर्छ । त्यस्तै मार्च १, २०२० भन्दा अगाडि र आवेदन दिने बेलामा आवेदकको आम्दानी उक्त क्षेत्रको औषत परिवारको आम्दानी भन्दा ८० प्रतिशत कम हुनुपर्छ । अर्थात् तपाई क्वीन्समा बस्नुहुन्छ र तपाईको परिवारको एकजनाको छ भने तपाईको बार्षिक आम्दानी ६३ हजार ७ सय भन्दा कम भएको खण्डमा तपाई यो कार्यक्रमका लागि योग्य हुनुहुनेछ । आफ्नो क्षेत्रको औषत आम्दानी र परिवारको साइज हेर्न यहाँ क्लिक गर्नुहोला ।
त्यस्तै आम्दानीको ३० प्रतिशभन्दा धेरै भाडामा प्रयोग भएको हुनुपर्छ । यदि तपाईको आम्दानी मासिक ४ हजार डलर छ भने र तपाईले भाडावापत १२ सय डलरभन्दा धेरै रकम तिर्नुभएको छ भने तपाई यो कार्यक्रमका लागि योग्य हुनुहुनेछ ।
त्यस्तै तपाईले कोरोनको महामारीका बेलामा अप्रिल १ देखि जुलाई ३१ भित्र काम गुमाउनुभएको छ, काम गर्ने अवधि घटेको छ भने पनि तपाई यो कार्यक्रमका लागि योग्य हुनुहुनेछ । तपाईले काम गुमाएका कारण बेरोजगारी विमारकम पाउनु भएको छ भने त्यसलाई आम्दानीका रुपमा उल्लेख गर्नुपर्छ ।
म यो कार्यक्रमका लागि योग्य भएमा कस्तो सहायता पाउनेछु ?
योग्यहरुले भाडाको भारको फरक रकम प्राप्त गर्नेछन् । आवेदकले एकमहिनादेखि ४ महिनासम्मको भाडाको हिस्सा प्राप्त गर्न सक्नेछन् । यो सब्सीडी रकम सिधै घरधनीको खातामा पठाइनेछ । उदाहरणका लागि कोरोना महामारी सुरु हुनुभन्दा अगाडि तपाईको मासिक आम्दानी २ हजार डलर थियो र तपाईले ७ सय डलर भाडा तिरिरहनुभएको थियो भने तपाईको आम्दानीको ३५ प्रतिशत भाडामा खर्च भएको थियो । कोरोनाको महामारीपछि तपाईको आम्दानी घटेर १४ सय पुगेको छ भने तपाईले अब आम्दानीको ५० प्रतिशत रकम भाडामा खर्च गर्नुभएको छ । तपाईले यो कार्यक्रम अन्तरगत अब १५ प्रतिशत फरक रकम प्राप्त गर्नुहुनेछ । अर्थात् तपाईले मासिक २१० डलर अर्थात् ४ महिनाको ८४० डलरसम्म प्राप्त गर्न सक्नुहुनेछ ।
यो कार्यक्रम अन्तरगत अधिकतम कति रकम प्राप्त गर्न सकिनेछ ?
कुनै पनि क्षेत्रका लागि स्वच्छ बजार भाडादर तोकिएको छ । तपाईले प्राप्त गर्ने अधिकतम रकम उक्त भाडादरभन्दा १२५ प्रतिशतभन्दा माथि हुँदैन । उदाहरणका लागि क्वीन्समा भाडामा बस्नेले स्टुडियोमा बस्नेले मासिक अधिकतम २०८१ डलरसम्म, एउटा बेडरुम अपार्टमेन्टमा बस्नेले २१४३ डलरसम्म , २ वटा बेडरुम अपार्टमेन्टमा बस्नेले २४३९ डलर, ३ बेडरुम अपार्टमेन्टमा बस्नेले ३ हजार ९० डलर र ४ बेडरुम अपार्टमेन्टमा बस्नेले ३३०४ डलरसम्म पाउनसक्नेछ । आफ्नो क्षेत्रको हेर्न यहाँ क्लिक गर्नुहोला ।
आवेदनको प्रकृया कस्तो हुन्छ ?
आवेदन दिंदा आवेदकलाई योग्यताबारेका विभिन्न प्रश्नहरु सोधिनेछ । आवेदकले योग्यता प्रमाणित गर्ने कागजातसमेत बुझाउनुपर्छ । परिवारको संख्या, मार्च १ भन्दा अगाडिको आम्दानी, अहिलेको आम्दानी लगायतका विवरण बुझाउनुपर्छ । आवेदक योग्य ठहरिएमा कागजात पेश गर्न र योग्यता प्रमाणित गर्न भनिनेछ । सबै सुचनाहरु भेरिफाइ गरिसकेपछि रकम घरवेटीको खातामा पठाइनेछ । उक्त रकम समरको अन्त्यसम्म पठाउने लक्ष्य लिइएको छ ।
योग्यता प्रमाणित गर्न कस्ता कागजात पेश गर्नुपर्छ ?
आवेदकले लिजको प्रतिलिपी पठाउन सक्छन् । यदि लिजको प्रतिलिपी नभएको खण्डमा मासिक भाडा तिरेको अन्य प्रमाण पठाउन सकिनेछ । त्यस्तै मार्च १ भन्दा अगाडिको आम्दानी र अहिलेको आम्दानीको प्रमाण बुझाउनुपर्नेछ । पेस्टब, रोजगारदाताको पत्र, ट्याक्स रिटर्न लगायतका कागजातलाई प्रमाणका रुपमा स्वीकार गरिनेछ ।
यो कार्यक्रमका लागि योग्य भएमा मैले घरवेटीलाई भाडा तिनुपर्छ ?
यो कार्यक्रम अन्तरगत तपाईको भाडाको भारको फरक रकममात्र होम एण्ड कम्युनिटी रिन्युवलले तिरिदिन्छ । उक्त रकम सिधै घरवेटीको खातामा पठाइन्छ । त्यो बाहेकको बाँकी भाडारकम भने तपाई आफैले तिर्नुपर्छ ।
मैले पहिले नै भाडा तिरिसकेको छु । के म यो सहायताका लागि योग्य हुनेछु ?
तपाईले पहिले नै भाडा तिरिसक्नुभएको छ भने पनि यो सहायता रकमका लागि योग्य हुनसक्नुहुनेछ । पहिले नै भाडा तिरेको भएमा प्राप्त रकम आगामी महिनाको भाडाका रुपमा प्रयोग गर्न सकिनेछ । वा उक्त रकम सेक्युरिटी डिपोजिटका रुपमा घरवेटी प्रयोग गर्न अनुमति दिन सकिनेछ । सहायता रकम कसरी प्रयोग गर्ने भन्ने सन्दर्भमा आवेदन दिने बेलामा विवरणहरु बुझाउनुपर्छ ।
मेरो कुनै लिजको कागजात छैन, म महिनामहिनामा भाडा तिर्छु ? म यो सहायताका लागि योग्य हुन्छु ?
सहायता प्राप्त गर्नका लागि आवेदकसँग अद्यावधिक लिज कागजात हुन जरुरी छैन । तर आवेदकले आफू भाडा तिर्नका लागि जिम्मेबार रहेको प्रमाणित भने गर्न सक्नुपर्छ ।
कुन कुन आम्दानीलाई घरको आम्दानीका रुपमा लिइनेछ ?
सबै प्रकारका आम्दानीहरुलाई आम्दानीका रुपमा लिइन्छ । बेरोजगारी बिमा, महामारी बेरोजगारी सहायता वा महामारी बेरोजगारी क्षतिपूर्ति, तलब, ज्याला, टिप्स, उपहार लगायतका आम्दानीलाई पनि आम्दानीका रुपमा लिइनेछ । १८ बर्षभन्दा कम उमेरका बच्चाहरुका सन्दर्भमा आम्दानीलाई समावेश गर्न आवश्यक पर्दैन । १८ बर्ष नाघेका पूर्णकालिन विद्यार्थीको आम्दानीपनि समावेश गर्न पर्दैन । फोस्टर केयर पेमेन्ट, स्न्याप लगायतका आम्दानी पनि उल्लेख गर्न पर्दैन । संघीय सरकारबाट प्राप्त कोरोनाको १२ सय डलर (कसैको कम वा बढी) को चेकलाई आम्दानीका रुपमा लिइदैन ।
यो सहायता प्राप्त गर्नका लागि कुनै आप्रवासी स्टाटस हुन जरुरी हुन्छ ?
व्यक्तिगत उत्तरदायीत्व तर कामको अवशर मेलमिलाप ऐन १९९६ अन्तरगत सहायता प्राप्त गर्न योग्य व्यक्तिले यो सहायता पाउन सक्छ । उदाहरणका लागि परिवारमा कोही व्यक्ति अमेरिकन नागरिक छ वा बच्चा अमेरिकी नागरिक छ भने उक्त परिवारले सहायता पाउनेछ । आवेदक १८ बर्ष नाघेको हुनुपर्छ । सहायताका लागि योग्य हुन अमेरिकी नागरिक बच्चाका बाबुआमाले आवेदन दिन आवश्यक पर्दैन । ऐन अन्तरगत योग्य भए नभएको जाँच्न यहाँ क्लिक गर्नुहोला ।
छानिएको जानकारी कसरी प्राप्त हुन्छ ?
आवेदन छनौट भएको खण्डमा त्यसको जानकारी आवेदक र घरवेटी दुबैलाई पत्रमार्फत दिइनेछ । पत्रमा प्राप्त रकमको विवरण, प्राप्त गर्ने टाइमलाइन लगायत उल्लेख हुनेछ । भविश्यमा घरवेटीले रकम नपाएको बताएमा प्रमाणका लागि आवेदकले उक्त पत्र आफूसँग राख्नुपर्छ ।
कस्तो खालको भाडामा बस्नेलाई सहायता प्राप्त हुन्छ ? रुममेटका रुपमा बस्नेलाई हुन्छ कि हुँदैन ?
अपार्टमेन्ट रेन्टल, सिंगल परिवारको घर, भाडामा लगाउनका लागि बनाइएको घर लगायतमा बस्नेले यो सहायता प्राप्त गर्न सक्छन् । रुममेटसँग बस्नेहरु पनि सहायताका लागि योग्य हुनेछन् । रुममेटलेमात्र आवेदन दिंदा उसको हिस्साको भाडादर उल्लेख गर्नुपर्छ । तर रुममेट र भाडामा बस्ने मुख्य व्यक्तिले आवेदन दिंदा हाउसहोल्डका रुपमा संयुक्त रुपमा दिनुपर्छ । हाउसहोल्डको एउटा व्यक्ति अमेरिकी नागरिक भएमा यो सहायताका लागि योग्य भइन्छ ।
