बेरोजगारी विमा साप्ताहिक प्रमाणिकरण गर्दा झुक्किनु त भएन ? सहि तरिका यस्तो

खसोखास अमेरिका ब्यूरो

---

प्रकाशित मिति : जेष्ठ ४, २०७७ आईतबार

न्युयोर्क डिपार्टमेन्ट अफ लेवरले बेरोजगारी विमा साप्ताहिक प्रमाणिकरण गर्दा दुई प्रकारका प्रश्नावलीहरु तयार पारेको छ ।

यदि तपाईको प्रारम्भिक बेरोजगारी विमा आवेदन पेन्डिङ अवस्थामा छ भने तपाइले ७ वटा वटा प्रश्नको जवाफ दिनुपर्ने हुन्छ । त्यस्तै तपाईको नियमित बेरोजगारी विमा आवेदन स्वीकृत भइसकेको छ भने पनि तपाईले ७ वटा प्रश्नको जवाफ दिनुपर्ने हुन्छ ।

तर तपाई नियमित बेरोजगारी विमा रकमका लागि योग्य नभई महामारी बेरोजगारी सहायता पीयुएका लागि योग्य हुनुभएको छ भने तपाईले ५ वटा प्रश्नको जवाफ दिनुपर्ने हुन्छ ।

नियमित बेरोजगारी विमाको साप्ताहिक प्रमाणिकरण गर्दा तपाईलाई पहिलो प्रश्न कतै तपाईले गएको साता कुनै जागिरको अफर वा रिफरल अस्वीकार गर्नुभएको थियो कि भनेर सोधिएको हुन्छ । तपाई बेरोजगारी विमा रकमका लागि योग्य हुन जागिरको अफर वा रिफरल अस्वीकार गरेको हुनुहुँदैन ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

त्यस्तै तपाईले सेल्फ इम्प्लोयमेन्ट सहित गएको साता कति दिन काम गर्नुभयो भनेर सोधिएको हुन्छ । तपाईले यदि ४ वा त्योभन्दा बढी दिन काम गर्नुभएको छ भने तपाई बेरोजगारी विमा रकमका लागि योग्य हुनुहुनेछैन । काम गर्नुभएको छैन भने तपाईले शुन्य छनौट गर्नुहोला । यदि एक, दुई वा तीन दिन काम गर्नुभएको छ भने त्यो दिनको संख्या लेख्नुहोला ।

अर्को प्रश्नमा तपाईले गतसाता ५०४ डलरभन्दा बढी आम्दानी गर्नुभयो कि भएन भनेर सोधिन्छ । यदि तपाईले ५०४ डलरभन्दा बढी आम्दानी गर्नुभएको थिएन भनेमात्र तपाई विमा रकमका लागि योग्य हुनुहुनेछ । यदि तपाई एक, दुई वा तीन दिन काम गर्नुभएको थियो तर ५०४ डलरभन्दा कम आम्दानी थियो भने तपाई विमा रकमका लागि योग्य हुनुहुनेछ ।

त्यस्तै तपाई गत साता काम गर्न तयार, इच्छुक र सक्षम हुनुहुन्थ्यो कि भनेर सोधिन्छ । तपाई वेराजगारी विमा रकमका लागि योग्य हुन काम गर्न तयार, इच्छुक र सक्षम भएको हुनुपर्छ । अर्को प्रश्नमा तपाईले विदाको रकम पाउनुभयो कि भनेर सोधिन्छ । विदाको रकम प्राप्त नगरेको खण्डमामात्र तपाई विमा रकमका लागि योग्य हुनुहुनेछ ।

त्यस्तै तपाईले चाडपर्वविदाको रकम पाउनुभयो कि भनेर सोधिएको हुन्छ । तपाईले त्यस्तो रकम पाउनुभएको थियो भने उल्लेख गर्नुहोला । तर तपाईले पाएको रकम मापदण्डभन्दा धेरै नै छ भने तपाई उक्त साताको विमा रकमका लागि अयोग्य समेत हुनसक्नुहुनेछ ।

र, अन्त्यमा तपाई काममा फर्कनुभयो भनेर सोधिन्छ । यो प्रश्नको जवाफमा विशेष सावधानी अपनाउनुहोला । यदि तपाई ४ दिनभन्दा कमको पार्टटाइम काममा फर्कनुभएको हो भने पनि तपाईले छैनमा टिक लगाउनुपर्छ । त्यस्तै तपाईले अहिले गरिरहेको काम पनि ४ दिनभन्दा कमको पार्टटाइम काम हो भने काममा फर्केको छैन मा टिक लगाउनुपर्छ । तर तपाईले पूर्णकालिन काममा फर्कनुभएको हो भने छ मा टिक लगाउनुपर्छ ।

यदि तपाई पार्टटाइम पनि काम गर्नुभएको छैन र काममा फर्कनुभएको छैन भने विमा रकम प्राप्त गर्नका लागि तपाईको जवाफ यस्तो हुनुपर्छ । सब्मिट गर्नुअगाडि एकपटक स्क्रीन चेक गर्न नबिर्सनुहोला ।

उदाहरणका लागि तपाईले ३ दिन पार्टटाइम काम गर्नुभएको छ तर पूर्णरुपमा काममा फर्कनुभएको छैन भने तपाईले साप्ताहिक प्रमाणिकरणमा क्लिक गर्नुअगाडि प्रश्नावलीको जवाफ दिइसकेपछि यस्तो स्क्रीन देखापर्छ । यदि यो स्क्रीनमा उल्लेख भएको विवरण सच्याउनुपरेमा तपाईले सम्पादन बटनमा क्लिक गरेर सच्याउनुहोला ।

याद गर्नुहोस्, यदि तपाईले सब्मिट गरिसक्नुभएको छ भने यो स्क्रीनमार्फत सच्याउन सक्नुहुनेछैन । सब्मिट गरिसकेको साप्ताहिक प्रमाणिकरण सच्याउन तपाईले अनलाइन एकाउन्टको इनबक्समा गएर उपयुक्त शीर्षक छानेर इमेल पठाउनुपर्ने हुन्छ ।

यदि तपाई नियमित बेरोजगारी विमा रकमका लागि अयोग्य हुनुभएको छ तर महामारी बेरोजगारी सहायता पीयुएका लागि योग्य हुनुभएको छ भने तपाईले विभिन्न ५ प्रश्नहरुको जवाफ दिनुपर्छ ।

पहिलो प्रश्नमा सेल्फ इम्प्लोयमेन्टसहित तपाई गतसाता कति दिन काम गर्नुभयो भनेर सोधिन्छ । यदि काम गर्नुभएको छैन भने शुन्य उल्लेख गर्नुहोला । काम गर्नुभएको छ भने जति दिन काम गर्नुभएको छ त्यो उल्लेख गर्नुहोला । यदि ४ दिन वा त्योभन्दा बढी काम गर्नुभएको भएमा तपाई महामारी बेरोजगारी सहायताका लागि अयोग्य हुनसक्नुहुनेछ ।

त्यस्तै तपाईले गतसाता गरेको कामबाट ५०४ डलरभन्दा बढी आम्दानी गर्नुभएको थियो कि भनेर अर्को प्रश्न सोधिएको हुन्छ । यो रकम तपाईले ट्याक्स काटेर पाएको कुल रकम ट्याक्सहितको रकम हो । यदि तपाईले ५०४ डलरभन्दा बढी आम्दानी गर्नुभएको थियो भने महामारी बेरोजगारी सहायताका लागि अयोग्य हुनसक्नुहुनेछ ।

पीयुएमा २ नम्बरको प्रश्नले तपाईले कन्फ्युज बनाउन सक्छ । त्यसमा गतसाता तपाईले कोरोना सम्बन्धित विभिन्न ८ शर्तहरु उल्लेख गरेर जागिर अस्वीकार गर्नुभएको थियो कि भनेर सोधिएको हुन्छ । पीयुए सहायता प्राप्त गर्नका लागि तपाईको जवाफ नो हुनुपर्छ । यदि तपाईले एसमा टिक लगाउनुभएमा तपाई कोरोनाबाट प्रभावित नभएको अवस्थामा जागिरको अफर अस्वीकार गरेको ठहर्छ । जसबाट तपाई महामारी बेरोजगारी सहायताका लागि अयोग्य हुनुहुनेछ ।

त्यस्तै तेश्रो प्रश्नमा कोरोनाको कारणबाहेक अन्य कारणबाट तपाई कतिदिन काममा जान अनिच्छुक वा अक्षम हुनुहुन्थ्यो भनेर सोधिएको हुन्छ । तपाई काममा जान इच्छुक, सक्षम वा तयार हुनुहुन्थेन भने महामारी बेरोजगारी सहायताका लागि अयोग्य हुनुहुनेछ ।

त्यस्तै अन्तिम प्रश्नमा तपाईले कति दिन तलबी बिरामी विदा वा तलबी विदा लिनुभयो भनेर सोधिएको हुन्छ । तपाई महामारी बेरोजगारी सहायताका लागि योग्य हुनका लागि तपाईले तलबी बिरामी विदा वा अन्य तलबी विदा लिनुहुँदैन ।

प्रश्नको जवाफ दिइसकेपछि तपाई अर्काे पेजमा जानुहुनेछ । उक्त पेजमा तपाईले आफुले दिएको जवाफ पुनरावलोकन गर्न सक्नुहुनेछ । उदाहरणका लागि तपाईको जवाफ यस्तो छ भने तपाई पीयुएका लागि योग्य हुनुहुनेछ । छैन भने अन्तिम सब्मिट गर्नुअगाडि सम्पादन गर्न वा सच्याउन सक्नुहुनेछ ।

याद गर्नुहोस्, यदि तपाईले गलत विवरण दिएर बेरोजगारी विमा रकम वा महामारी बेरोजगारी सहायता लिनुभएको छ भने तपाईले उक्त रकम फिर्ता गर्नुपर्ने र अन्य कारवाही समेत भोग्नुपर्ने हुनसक्छ ।

यदि तपाइले काम गुमाउनुभएको छ तर बेरोजगारी विमाका लागि आवेदन दिनुभएको छैन भने यहाँ क्लिक गर्नुहोला ।

यदि तपाइ न्युयोर्कबाहिर हुनुहुन्छ, काम गुमाउनुभएको छ तर बेरोजगारी विमाका लागि आवेदन दिनुभएको छैन भने यहाँ क्लिक गर्नुहोला ।