आइआरएसको गल्तीले १२ सय डलर पाएका तीनप्रकारका व्यक्तिले रकम फिर्ता गर्नुपर्ने
अमेरिकी सरकारले कोरोनाको महामारीबाट उत्पन्न आर्थिक संकटको सामना गर्न अमेरिकामा रहेका करदाता तथा कम आम्दानी भएका कारण कर तिर्न नपर्ने ग्रिनकार्डवाहक र नागरिकलाई १२ सय डलर पठाएको छ । तर आइआरएसको गल्तीले १२ सय डलर पाएका तीनप्रकारका व्यक्तिले रकम फिर्ता गर्नुपर्ने आईआरएसले जनाएको छ ।
यदि तपाईले तपाईको परिवारको मृत व्यक्तिको नाममा समेत रकम पाउनुभएको छ भने उक्त रकम तपाईले फिर्ता गर्नुपर्ने आईआरएसले जनाएको छ । मृत व्यक्तिको खातामा नभई घरको ठेगानामा उक्त चेक प्राप्त भएको छ भने उक्त चेक फिर्ता गर्न आईआरएसले सुझाव दिएको छ । खातामा रकम आएको भएमा पनि त्यस्तो रकम फिर्ता गर्नुपर्ने जनाइएको छ ।
त्यस्तै यदि कोही व्यक्तिले सन् २०१८ वा २०१९ को ज्वाइन्ट ट्याक्स फाइल गर्दा उल्लेख गरेको दम्पत्तिको देहान्त भइसकेको छ भने उक्त व्यक्तिलाई समेत जोडेर आईआरएसले रकम पठाएको हुनसक्छ । त्यस्तै यदि कोही व्यक्तिले सन् २०१८ वा २०१९ को ट्याक्स फाइल गर्दा उल्लेख गरेको १७ बर्षभन्दा कम उमेरको बच्चाबच्चीको मृत्यु भइसकेको छ तर उनीहरुलाई जोडेर थप ५ सय प्राप्त भएको हुनसक्छ । उक्त रकम फिर्ता गर्नुपर्ने आईआरएसले जनाएको छ ।
उदाहरणका लागि ज्वाइन्ट ट्याक्स फाइल गरेका दम्पत्तिमध्ये एकजनाको निधन भएको छ र २४ सय डलर प्राप्त भएको छ भने मृतकको भागको १२ सय डलरमात्र फिर्ता गर्नुपर्ने आईआरएसले जनाएको छ । त्यस्तै बच्चाबच्चीको सन्दर्भमा पनि मृत्यु भएकाको नाममा प्राप्त ५ सय डलरमात्र फिर्ता गर्नुपर्नेछ ।
यदि कोही व्यक्ति अमेरिकाको आवासीय व्यक्ति होइन तर उसले रकम प्राप्त गरेको छ भने पनि फिर्ता गर्नुपर्ने आईआरएसले जनाएको छ । आईआरएसको आवासीयको परिभाषामा पर्नका लागि निश्चित मापदण्ड पूरा गरेको हुनुपर्छ । यदि कुनै व्यक्ति ग्रिनकार्डवाहक होइन भने उक्त व्यक्ति आवासीयको परिभाषामा पर्नका लागि चालुबर्षमा ३१ दिन अमेरिकामा भौतिक रुपमा बसोबास गरेको र विगत ३ बर्षको अवधिमा कम्तीमा १८३ दिन अमेरिकामा बसेको हुनुपर्छ ।
१८३ दिनको बसाई गणना गर्दा चालुबर्षको सबै बसाई, अघिल्लोबर्षको ३ भागको एकभाग बसाई र अझ अघिल्लोबर्षको ६ भागको एकभाग बसाई गणना गरिन्छ । तर ए, जी, जे, क्यु, एफ र एम लगायतका भिसामा रहेका व्यक्ति प्रयाप्त समय बसेको भएपनि आवासीयको परिभाषामा पर्दैनन् । यदि आवासीयको परिभाषामा नपर्ने व्यक्तिले राहत रकम प्राप्त गरेको छ भने फिर्ता गर्नुपर्ने आईआरएसले जनाएको छ ।
यदि कोही व्यक्ति जेल परिसकेको छ र त्यस्तो व्यक्तिले रकम प्राप्त गरेको छ भने पनि त्यो रकम फिर्ता गर्नुपर्ने आईआरएसले जनाएको छ । यदि ज्वाइन्ट फाइल गरेको सन्दर्भमा दम्पत्तिमध्ये एकजनामात्र जेल परेको छ भने उसको भागको १२ सय डलरमात्र फिर्ता गर्नुपर्छ ।
यदि चेक प्राप्त भएको छ र रकम फिर्ता गर्नुपर्ने छ भने चेकको इन्डोर्स गर्ने सेक्सनमा भोइड लेख्नुपर्छ । त्यसपछि उक्त चेक आईआरएसको उपयुक्त ठेगानामा फिर्ता पठाउनुपर्छ । चेकमा स्टीच नलगाउन र नपट्याउन सुझाव दिइएको छ । साथै सानो नोट बनाएर चेक फिर्ता गर्नुपर्नाको कारण उल्लेख गर्न सुझाव दिइएको छ ।
यदि प्राप्त चेक साटिसकिएको छ वा डाइरेक्ट डिपोजिट प्राप्त भएको थियो भने फिर्ता गर्नुपरेमा पर्सनल चेक वा मनि अर्डर आईआरएसको उपयुक्त ठेगानामा पठाउनुपर्छ । चेक वा मनी अर्डर युएस ट्रेजरीका नाममा बनाउनुपर्छ । त्यस्तै २०२० ईआईपी लेखेर चेकप्राप्त गर्ने व्यक्तिको ट्याक्स आईडी वा सोसल सेक्युरिटी नम्बरसमेत उल्लेख गर्नुपर्छ । त्यस्तै रकम फिर्ता गर्नुपर्नाको कारण सहित एउटा नोटसमेत लेखेर पठाउन आईआरएसले सुझाव दिएको छ ।
रकम कसरी फिर्ता गर्ने वा कुन ठेगानामा गर्ने थाहा पाउन यहाँ क्लिक गर्न सक्नुहुनेछ ।
