भिसामा स्वास्थ्यविमाको नियम कार्यान्वयन नगर्न नाइन्थ सर्किट कोर्टको आदेश
प्रकाशित मिति : बैशाख २४, २०७७ बुधबार
ट्रम्प प्रशासनले लागु गर्न लागेको भिसामा स्वास्थ्यविमा सम्बन्धि नियम कार्यान्वयनमा नाइन्थ सर्किट कोर्टले रोक लगाएको छ । अदालतको आदेशपछि तत्कालका लागि यो नियम लागु नहुने भएको छ । तर सर्किट कोर्टको आदेशबिरुद्ध ट्रम्प प्रशासन सर्बोच्च अदालतमा जाने सम्भावना रहेको छ ।
यसअगाडि गत नोभेम्बरमा यो नियम कार्यान्वयनको तयारीमा रहेको थियो । तर ओरेगनको डिस्ट्रिक्ट कोर्टले यो नियम कार्यान्वयनमा अस्थायी रोक लगाएपछि नियम कार्यान्वयन हुन सकेको थिएन । डिस्ट्रिक्ट कोर्टकै आदेशलाई नाइन्थ सर्किट कोर्टले पनि सदर गरेको हो ।
तत्कालका लागि ट्रम्प प्रशासनको नियम कार्यान्वयन नहुने भएपनि ट्रम्पले ६० दिनका लागि आप्रवासनमा रोक लगाइसकेकाले यसको प्रत्यक्ष प्रभाव भने तत्कालका लागि नहुने भएको छ । ट्रम्प प्रशासनले कोरोनाको कारण देखाउँदै तत्कालका लागि आप्रवासी भिसा जारी गर्नमा रोक लगाएको छ ।
अमेरिकी सरकारले अमेरिकी स्वास्थ्य प्रणालीमा भार हुनसक्ने सम्भावना भएकाहरुको आप्रवासी भिसा अस्वीकृत गर्ने नियम लागु गर्ने तयारी गरेको थियो । यो नियम अनुशार अमेरिकाको सशुल्क स्वास्थ्य विमा भएको वा लिनेकुरा प्रमाणित गर्न नसक्नेहरुको भिसा अमेरिकी दूतावासले अस्वीकार गर्नसक्छ ।
नयाँ नियम लागु भएमा अमेरिकी स्वास्थ्यप्रणालीमा भार हुनसक्ने भन्दै बार्षिक ३ लाख ७५ हजार भन्दा धेरैको ग्रिनकार्ड अस्वीकार गर्न सक्ने अनुमान गरिएको छ । नयाँ नियम लागु भएमा अमेरिकाको आप्रवासी भिसा अर्थात् ग्रिनकार्डका लागि स्पोन्सर गर्ने स्पोन्सरकर्तामाथि थप जिम्मेबारी र भार थपिन्छ । नयाँ नियम अनुशार अमेरिकाको आप्रवासी भिसाका लागि आवेदन दिएको व्यक्तिले अमेरिकाको स्वास्थ्यप्रणालीमा आफू भार नहुने कुरा प्रमाणित गर्न नसके त्यस्ता व्यक्तिको भिसा अस्वीकृत हुनसक्छ ।
अमेरिकाको स्वास्थ्य प्रणालीमा भार हुनसक्ने व्यक्तिलाई अमेरिका प्रवेशमा रोक लगाउने सक्ने घोषणामा अमेरिकी राष्ट्रपति डोनाल्ड ट्रम्पले गत अक्टोबरको पहिलो साता हस्ताक्षर गरेका थिए । यो नयाँ नियम अमेरिकाबाहिरबाट अमेरिकाको आप्रवासी भिसा आवेदन दिनेहरुका हकमा मात्र लागु हुने उल्लेख गरिएको थियो ।
पहिले नै अमेरिकामा रहेकाहरु, अमेरिकी ग्रिनकार्डबाहकहरु, एसाइलम आवेदकहरु, शरणार्थीहरु र बालबालिकाहरुका सन्दर्भमा भने नयाँ नियम लागु नहुने जनाइएको थियो । तर डिभी लोटरी, परिवारमा आधारित र रोजगारमा आधारित ग्रिनकार्ड प्राप्त गर्नेगरी आप्रवासी भिसामा अमेरिका आउनेहरुका सन्दर्भमा भने यो नियम लागु हुने उल्लेख थियो ।
अमेरिकाको आप्रवासी भिसाका लागि आवेदन दिनेहरुले अमेरिका प्रवेश गरेको ३० दिनभित्र मान्यताप्राप्त स्वास्थ्यविमा लिने कुरा प्रमाणित गर्न सक्नुपर्ने नियममा उल्लेख छ । आवश्यक इन्सुरेन्स व्यक्तिगत रुपमा किन्न सकिने र रोजगारदाताले प्रदान गर्ने इन्सुरेन्सलाई पनि मान्यता दिइने नियममा उल्लेख छ । तर सरकारी सुविधाप्रदान गरिएको स्वास्थ्यविमालाई भने मान्यता दिइनेछैन ।
१ बर्षको अल्पकालिन स्वास्थ्य विमा, पारिवारिक सदस्यको स्वास्थ्य विमा, एकबर्षको भिजिटर स्वास्थ्य विमा योजनालाई पनि मान्यता दिइने नियममा उल्लेख छ ।
परिवारमा आधारित भिषा प्रकृयामा व्यक्तिको अनिवार्य बिमा हुनुपर्ने प्रावधान कार्यान्वयनमा अदालतले रोक लगाएको छ । राष्ट्रपति ट्रम्प प्रशासनले परिवारमा आधारित भिषा जारी गर्दा अनिवार्य बिमा हुनुपर्ने प्रावधान कायम गरेको थियो ।