महामारीमा महानायकका सुझाव : धेरै नखानु, कसरत गर्न नछोड्नु र हिम्मत नहार्नु
प्रकाशित मिति : बैशाख १५, २०७७ सोमबार
कोरोना महामारीबाट आक्रान्त नेपालीहरुलाई महानायक राजेश हमालले धैर्य गर्दै हिम्मत नहार्न सुझाव दिएका छन् ।
‘यतिबेला सिंगो संसार नै यो युद्ध लडिरहेको छ त्यसैले हामीले हिम्मतका साथ धैर्य गरेर यो लडाई लड्यौं भने पक्कै जित्नेछौं ‘ – महानायकले भने ।
अमेरिकामा रहेका पत्रकार सूर्य थापासंग भिडियो लाईभमा काठमाण्डौबाट बोल्दै महानायकले भने यो हाम्रो जिवनकालमा आउने निकै अप्ठ्यारो समय हो तर आत्तिएर भन्दा पनि बिज्ञानलाई आत्मसात् गर्दै अगाडि बढ्नु पर्दछ ।
नेपालमा लकडाउन छ अनि संसारभरका धेरै नेपालीहरु घरमै छन् त्यसैले आफ्नो स्वास्थ्य तन्दुरुस्त राख्न धेरै नखान र जिम बन्द छ भन्दै घरमा अल्छी भएर नबस्न पनि महानायकको आग्रह छ ।
हमालसंग पत्रकार थापाले गरेको प्रत्यक्ष कुराकानी
मानिसले चाहेमा सानै ठाउंमा पनि कसरत गर्न सकिन्छ म आफै पनि घरमै दैनिक कसरत गर्दछु उनले भने त्यसैले कोरोना महामारीलाई देखाएर कसरत गर्न रोक्न पनि हुंदैन ।
धेरै युवाहरुले रोजगार गुमाउनु पर्ने र मनोरन्जन क्षेत्रलाई पनि असर गर्ने चिन्ता ब्यक्त गर्दै हमालले भने आशा गरौं चांडै सबैको पंहुचमा हुने गरि खोप बन्नेछ र हामी पुरानै दिनमा फर्कन पाउंने छौं ।
भारतबाट नेपाल आउन खोजेका र बिभिन्न देशमा रोजगार गुमाएर घर फर्कन खोजेका युवाहरुको बारेमा चिन्ता ब्यक्त गर्दै हमालले भने मलाई बिश्वास छ सरकारले चांडै यस बिषयमा अवश्य कदम चाल्ने छ ।
धेरै दर्शकहरुले प्रत्यक्ष रुपमा हेर्दै प्रश्न राखेको कार्यक्रममा महानायक हमालले आफु अझै केहि समय फिल्म क्षेत्रमै काम गरेर मात्र राजनीतिमा आउने चाहना रहेको बताएका छन् ।