दर्जन बढी पुस्तकका लेखक अमेरिका निवासी थपलिया नयाँ पुस्तकको तयारीमा
प्रकाशित मिति : कार्तिक १९, २०७६ मंगलबार
अमेरिका निवासी युवा लेखक राजन थपिलिया नयाँ पुस्तकको तयारीमा लागेका छन् । उनले यसअगाडि एकदर्जन बढी पुस्तकहरु प्रकाशित गरिसकेका छन् । आगामी पुस्तक मोटिभेसनमा आधारित रहेको राजन थपलियाले जानकारी दिएका छन् ।
यसअगाडि ४३ बर्षसम्म जेलमा विताएका एकजना कैदीको कथामा आधारित फिफ्टी फाइभ इयर्स अमेजनमार्फत सार्वजनिक गरिएको थियो । १८ बर्षको उमेरमा प्रहरीको हत्या गरेर जेलमा परेका न्युयोर्कका डानियल ज्याक्सनको बाल्यकालको सपना र उनले भोग्नुपरेको यथार्थबीचको मनोविज्ञानलाई कथामा देखाइएको थियो ।
उनको ११ औं पुस्तकका रुपमा शतप्रतिशत जीवन प्रकाशित भएको थियो । यो पुस्तकमा कसरी शतप्रतिशत जीवन जिउन सकिन्छ भन्नेबारे सिकाइएको थियो । सकारात्मक सोंच र आत्मप्रेरक पुस्तकहरु लेख्ने थपलियाको यो पुस्तक शतप्रतिशत जीवन अर्थात् हन्ड्रेड पर्सेन्ट लाइफमा जीवनबारे बहुउपयोगी शुत्रहरु समेत दिइएको थियो । यो पुस्तक सगरमाथाबाट लोकार्पण गरिएको थियो ।
उनका पुस्तकहरु अमेजन लगायतका अनलाइन प्लेटफर्महरुमार्फत किन्न सकिन्छ । राजनले हफिंटन पोष्ट, इलाइट डेली, थ्राइभ ग्लोबल लगायतका विश्व प्रसिद्ध संचारमाध्यममा समेत लेख्दै आएका छन् ।
लेखक राजन थपलिया आफूलाई राम्रो पाठक भन्न रुचाउँछन् । १० कक्षामा पढ्ने बेलामा नै ३ हजार किताब पढेको भनेर उनको चर्चा भएको थियो । उनले ‘थिंक अबाउट इट’, ‘सिम्पल रुल्स र ‘टर्निङ प्वाइन्स’ भन्ने किताब लेखेका छन् । उनको मेडिकल साइन्समा आधारित ‘स्विट स्पिसेस’ ‘रिजोइस’को दुईटा सिरिज आइसकेको छ ।
थपलियाको कविता नेपालको कोर्सबुकमा समेत राखिएको छ । थपलियाको कविता कक्षा ६ को अँग्रेजी कोर्सबुकमा राखिएको हो ।
नेपालका अँग्रेजी माध्यमका कैयन विद्यालयहरुमा उक्त पुस्तक पढाइदै आएको छ ।