सुनिल थापाले सलमान खानको फिल्म खेल्ने, मुखियाको भूमिका
प्रकाशित मिति : कार्तिक १८, २०७६ सोमबार
चर्चित नेपाली कलाकार सुनिल थापाले सलमान खानले निर्माण गर्न लागेको चलचित्र क्वाथामा अभिनय गर्ने भएका छन् । जनवरीदेखि उक्त चलचित्रको छायांकनमा आफू व्यस्त रहने थापाले जानकारी दिएका छन् । यसअगाडि उनले बलिउड फिल्म मेरी कोममा अभिनेत्री प्रियंका चोपडाको गुरुका रोलमा अभिनय गरेका थिए ।
‘क्वाथा’ बाटै बलिउड अभिनेत्री क्याटरिना क्याफकी बहिनी इसाबेल क्याफले डेब्यु गर्न लागेको जनाइएको छ । आयुष शर्मा मुख्य भूमिकामा रहने यो फिल्ममा मणिपुर राज्यको वास्तविक कथा समेटिएको जनाइएको छ ।
सुनिल थापाले मुखियाको भूमिकामा अभिनय गर्ने र फिल्मको छायांकन थाइल्याण्डमा हुने जनाइएको छ । झन्डै ३ सय नेपाली फिल्म खेलेका सुनिल थापा सन् १९६४ मा चेतन आनन्दको चर्चित फिल्म ‘साहिब बहादुर’ बाट बलिउडमा प्रवेश गरेका थिए । त्यसपछि उनले तेलगु फिल्म ‘काश्मिर कादली’ मा अभिनय गरेका थिए । थापाले बलिउडको फिल्म ‘एक दुजेके लिए’ मा पनि अभिनय गरेका थिए ।
नेपाली फिल्म ‘साइनो’ मा अभिनयका लागि काठमाडौं आएदेखि थापा नेपाली फिल्म उद्योगमा नै जमेका छन् । थापाको पुर्ख्यौली घर भने पाल्पा हो ।