नेपाल र नेपाल भ्रमण वर्षको प्रवर्द्धन गर्दै विश्वकै ठूलो न्युयोर्क म्याराथनमा दौडिए रोजन
प्रकाशित मिति : कार्तिक १७, २०७६ आईतबार
न्युयोर्क म्याराथन पूरा गरिसकेपछि गोरखाका रोजन श्रेष्ठ ।
नेपाल र नेपाल भ्रमण वर्षको प्रवर्द्धन गर्दै विश्वकै ठूलो न्युयोर्क म्याराथनमा रोजन श्रेष्ठले दौड पूरा गरेका छन् । न्युयोर्क सिटीको स्टेटन आइल्याण्डबाट दौडन सुरु गरेका उनी ब्रुकलिन, क्वीन्स, ब्रोंक्स लगायतका स्थानहरुहुँदै म्यानहटनको सेन्ट्रल पार्कमा आएका थिए ।
विश्वका १२५ देशका सहभागीहरु दौडिएको उक्त म्याराथनमा श्रेष्ठले नेपाल भ्रमण वर्ष २०२० लेखिएको टिसर्ट लगाएर दौडिएका छन् । २६ दशमलव २ माइल लामो म्याराथन न्युयोर्कको सेन्ट्रल पार्कमा समापन भएको थियो ।
विश्वको सबैभन्दा ठूलो न्युयोर्क म्याराथन हरेक वर्ष नोभेम्बरको पहिलो आइतवार आयोजना गरिदै आएको छ । म्याराथनको १० लाखले भन्दा धेरैले प्रत्यक्ष अवलोकन गरेका छन् भने १० हजार स्वयमसेवकहरु खटिएका थिए ।
आफूहरु न्युयोर्क म्याराथनमा दौडने नेपालीहरुको हौसला बढाउन स्थलमा समेत पुगेको र यसबाट नेपालको पर्यटन प्रवद्र्धनको दिशामा समेत सकारात्मक सन्देश गएको न्युयोर्कका लागि नेपाली महावाणिज्यदूतावासका कार्यवाहक महावाणिज्यदूत पुष्पराज भट्टराईले बताए ।
रोजनले आफू अमेरिकाको कोलोराडोमा हुँदा तीनबर्ष अगाडिदेखि दौडन सुरु गरेका थिए । उनले एकमाइलबाट दौडन सुरु गरेका थिए भने हरेकपटकमा एक चौथाई माइल थप्दै आफ्नो गति बढाएका थिए ।
उनी फ्लोरिडा र शियाटलमा विभिन्न खालका अवरोधहरु पार गर्दै दौडनुपर्ने स्पार्टन रेसमा समेत सहभागी भइसकेका छन् । उनी हवाईमा तेश्रो स्पार्टन रेसका लागि समेत छनौट भएका थिए ।
नेपालको गोरखामा जन्मिएका रोजनले आफ्नो जन्मस्थानको इतिहास नै दौडसँग सम्बन्धित भएको र दौडमा सहभागी हुँदा आफूलाई भित्रैदेखि आत्मसन्तुष्टी मिलेको बताएका छन् । गोरखाको लिगलिगकोटमा हरेक दशैंको टिकाको दिनमा दौडको आयोजना गरिने र जित्नेलाई राजा बनाइने गरेको इतिहास समेत रहेको छ ।
रोजन भन्छन् प्राय नेपालीहरु आफ्ना पुर्खाको बहादुरीप्रति गर्व गर्छन् । तर कुरा गरेरमात्र होइन पुर्खाको विराशतलाई व्यवहारमा समेत निरन्तरता दिनुपर्छ भन्ने भावना मभित्र छ । म नेपाली हुँ र त्यसमा पनि गोरखाली ।
आफू शाकाहारी रहेका रोजन शाकाहारी व्यक्तिसमेत खेलकुदमा सहभागी हुनसक्छन् भन्ने सन्देश समेत आफूले दिन चाहेको बताउँछन् । त्यस्तै हरेक युवाले आफ्नो क्षमताको सम्मान गरेर त्यसलाई शक्तिमा परिणत गर्नुपर्ने बताउँदै उनी भन्छन् – ‘तपाई आफूले गर्न नसक्ने चीज गर्नुहुन्न भने ठीकै छ । तर गर्न सक्ने चीज पनि गर्नुहुन्न भने त्यो अत्यन्तै गलत हो ।’
आफूले म्याराथनमा प्राय अन्य देशका नागरिकहरुमात्र दौडेको र नेपालीहरु कमैमात्र दौडेको देखेकाले आफूले न्युयोर्क म्याराथनमा दौडने निर्णय गरेको उनले बताएका छन् । केही पनि गर्न नसक्ने सोंच्नेहरुमाझ आफू उदाहरण बन्न चाहेको उनको भनाई छ ।
