Follow @khasokhasmag

अष्ट्रेलिया निवासी सञ्चारकर्मी चिरञ्जीवी देवकोटा नेपाली पर्यटनदूत


प्रकाशित मिति : श्रावण २८, २०७३ शुक्रबार

अष्ट्रेलियाको भिक्टोरिया निवासी सञ्चारकर्मी चिरञ्जीवी देवकोटालाई नेपाल पर्यटन बोर्डले मानार्थ पर्यटनदूत नियुक्त गरेको छ । पर्यटन बोर्डले अष्ट्रेलियाको भिक्टोरिया राज्यका लागि अवैतनिक पर्यटनदूतको रुपमा देवकोटालाई आगामी दुई वर्षका लागि नियुक्त गरेको हो । पर्यटनका गतिविधिलाई अझ बढाउन नेपाल सरकार पर्यटन बोर्डले विभिन्न शहरहरुका लागि पर्यटनदूत नियुक्त गर्नेक्रममा भिक्टोरिया राज्यका लागि देवकोटालाई नियुक्त गरेको हो ।

उहाँले क्यानबेरामा रहेको नेपाली दूतावास र अन्य सरकारी निकायहरुसँगको समन्वयमा पर्यटन सम्बन्धी गतिविधि प्रबद्र्धन गर्नका लागि क्रियाशिल रहने प्रतिबद्धता व्यक्त गर्नुभएको छ । साथै, नेपाल पर्यटन बोर्डको प्रतिनिधित्व गर्दै विभिन्न कार्यक्रमहरुमा सहभागी हुने, अष्ट्रेलियामा पर्यटनसँग सम्बन्धित निकायहरुसँग समन्वय गरी नेपालमा पर्यटकको संख्या बृद्धिका लागि योगदान दिने पनि उहाँको दायित्व रहनेछ । सञ्चारकर्मी देवकोटाले पत्रकारितामा स्नातकोत्तर गर्नुभएको छ । उहाँ नेपालमा पछिल्लो पटक न्यूज २४ टेलिभिजनको समाचार प्रमुखको रुपमा कार्यरत हुनुहुन्थ्यो ।

टेलिभिजन एडिटर्स गिल्डका महासचिव समेत रहनुभएका देवकोटा हाल अष्ट्रेलियाबाट प्रसारित हुने नेपाली भाषाको टेलिभिजन एमएनटीभीको प्रधान सम्पादकका रुपमा कार्यरत हुनुहुन्छ । ईमेज च्यानल, नेपाल वन टेलिभिजन, सगरमाथा टेलिभिजनमा समेत गरी एक दशकभन्दा बढी टेलिभिजन पत्रकारिता गर्नुभएका देवकोटालाई यसअघि थाईल्याण्डमा आयोजित एक कार्यक्रममा वल्र्ड पिस फाउन्डेशनले वल्र्ड पिस एम्बेसडरको रुपमा सम्मान गरेको थियो ।

नियुक्तिपछि देवकोटाले भन्नुभयो, “नेपाल भगवान गौतम बुद्धको जन्मथलो हो, सर्वोच्च शिखर सगरमाथाको देश हो । पछिल्लो समयमा उच्च शिक्षा अध्ययनका लागि ठूलो संख्यामा नेपालीहरु अष्ट्रेलिया आएका छन् । उनीहरु विभिन्न ठाउँमा काम गर्दछन् । यहाँको स्थानीय समूदायसँग नेपालीको घुलमिलले अष्ट्रेलियनहरुमा नेपालप्रति चासो बढेको छ । अष्ट्रेलियनहरु घुम्न रुचाउँछन् । वर्षेनी पर्यटकका रुपमा विभिन्न देश गइरहन्छन् । नेपालको प्रचार, पर्यटकीय क्षेत्रहरुको जानकारी दिँदै नेपालतर्फ उनीहरुलाई आकर्षित गर्न सकेमा पक्कै पनि यसले देशको अर्थतन्त्रमा महत्वपूर्ण योगदान दिनेछ । यसैतर्फ लाग्ने मेरो प्रयास रहनेछ । विदेशमा रहेका हामी सबै नेपाली नेपालका दूत नै हौं । तर, यो निर्णयबाट थप जिम्मेवारीबोध भएको छ ।”

नेपाल अष्ट्रेलियाबीच सन् १९६० मा दौंत्य सम्बन्ध स्थापित भएको थियो । नेपालमा वर्षेनी २२ हजारभन्दा बढी अष्ट्रेलियन पर्यटकहरु घुम्न आउने गरेका छन् ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com