अर्घाखाँचीमा जिप दुर्घटना, ३ जनाको ज्यान गयाे, ६ घाइते
प्रकाशित मिति : आश्विन २०, २०७६ सोमबार
अर्घाखाँची जिल्लाको सन्धिखर्क नगरपालिका वडा नं ६ मा यात्रुबाहक बलेरो जिप दुर्घटनामा परी ३ जनाको ज्यान गएको छ भने ६ जना घाइते भएका छन् । कपिलवस्तुको कृष्णनगरबाट सन्धिखर्क आउदै लु १ ज ४३२९ नम्वरकोे बलेरो जिप दुर्घटना हुदा ३ जनाको घटनास्थलमै ज्यान गएको जिल्ला प्रहरी कार्यालय अर्घाखाँचीले जानकारी दिएको छ ।
दुर्घटनामा ज्यान जानेहरु भूमिकास्थान नगरपालिका वडा नं. २ ढाकावाङ्ग घर भइ हाल लमही नगरपालिका वडा नं. ५, दाङ्ग वस्ने वर्ष ५१ का घनश्याम खनाल र उनकी श्रीमति वर्ष ४६की श्यामकला खनाल रहेको प्रहरीले बताएका छन् । एक जना पुरूषको सनाखत हुन नसकेको जिल्ला प्रहरी कार्यालय अर्घाखाँचीका प्रहरी नायव उपरिक्षक प्रकाश विष्टले जनाकारी दिएका हुन् ।
दुर्घटनामा भूमिकास्थान नगरपालिका–१०, धनचौरकी वर्ष १९ की सिमा रेग्मी, भूमिकास्थान नगरपालिका–१० धनचौरकी वर्ष ३० का उमेश रेग्मी, वर्ष १ को आदित्य रेग्मी, लमही ५ दाङ्गका वर्ष १२–की अनिता खनाल, बुद्धभूमि नगरपालिका–२ गोरुसिङ्गेका वर्ष २४ को विरेन्द्र श्रेष्ठ (चालक), लमही नगरपालिका–५ दाङ्गकी विन्दु खनाल घाइते भएका छन् ।
घाइतेहरुमध्ये अनिता खनाल, विरेन्द्र श्रेष्ठ (चालक), उमेश रेग्मी र विन्दु खनाललाई सन्धिखर्क अस्पतालबाट थप उपचारका लागि भैरहवा मेडिकल कलेजका रिफर गरेको प्रमुख जिल्ला अधिकारी विजयराज पौडेलले बताए । अन्य घाईतेहरुको सन्धिखर्क अस्पतालमा उपचार भइरहेको छ ।