भाडामा बस्नेलाई अध्यागमनको डर देखाउने घरवेटीलाई न्युयोर्कंमा १७ हजार डलर जरिवाना
प्रकाशित मिति : आश्विन ५, २०७६ आईतबार
न्युयोर्क सिटीका न्यायाधिसले भाडामा बस्ने कागजपत्रविहिनलाई अध्यागमनको डर देखाउने घरवेटीलाई १७ हजार डलर जरिवानाको सजाय तोकेका छन् । घरवेटीले भाडामा बस्नेलाई अध्यागमनलाई फोन गरेर देशनिकाला गराइदिने भन्दै धम्की दिने गरेका थिए ।
कागजपत्रविहिन भाडावाललाई अध्यागमनको डर देखाएर तर्साएको यो घटना पहिलो भएको न्युयोर्क सिटी मानअवधिकार आयोगका प्रवक्ताले जनाएका छन् । भाडावालले कागजपत्रविहिनमाथि घरवेटीले विभेद गरेको गुनासो सहित आवेदन दिएका थिए ।
न्यायाधिस जोन बी स्पुनरले घरेवेटीलाई ५ हजार डलर साधारण जरिवाना र त्रास देखाएर मानसिक रुपमा आतंकित पारेकोमा १२ हजार डलर क्षतिपूर्ति दिनुपर्ने सजाय सुनाएका हुन् । त्यसका साथै घरवेटी ५० घण्टाको सामुदायिक सेवा समेत गर्नुपर्ने भएको छ ।
भाडावाल व्यक्ति होली अन्डान सन् २०११ को सेप्टेम्बरदेखि सन् २०१८ को सेप्टेम्बरसम्म न्युयोर्कको क्वीन्समा रहेको अपार्टमेन्टमा बसेका थिए । सन् २०१७ को अक्टोबरदेखि आर्थिक अभावका कारण उनले भाडा नतिरेपछि घरवेटी डायना लाइसिसले अध्यागमन लगाइदिने भनेर धम्क्याएको जनाइएको छ ।