न्युयोर्क सिटीका स्टोरमा हुने चोरी रोक्न स्टोरका भिडियो प्रहरीले लाइभ हेर्ने प्रविधि घोषणा
प्रकाशित मिति : जेष्ठ ३, २०८१ बिहीबार
न्युयोर्क सिटीले स्टोरहरुमा हुने चोरी नियन्त्रणका लागि नवीन प्रविधिको घोषणा गरेको छ , जस अन्तरगत व्यवसायहरूले निगरानी क्यामेराका लाइभ भिडियो फिडहरु प्रहरीसँग शेयर गर्नसक्ने भएका छन् । न्युयोर्क सिटीका मेयर एरिक आडम्सले बिहीबार खुद्रा चोरी र अपराध नियन्त्रणका लागि प्रविधि प्रयोग गर्ने एक परीक्षण कार्यक्रमको सुरुवात गरेको घोषणा गरेका छन् ।
मेयर एरिक आडम्सले चोरहरू र संगठित अपराधीहरुको गिरोगहलाई व्यवसायहरूको शिकार गर्न अनुमति दिन नसकिने बताएका छन् । व्यवसायीहरु खुद्रा चोरीको कारणले आम्दानी गुम्ने डर बिना नै न्युयोर्क सिटीका पाँचवटा बरोहरूमा व्यवसायहरू सञ्चालन गर्न सक्षम हुनुपर्ने उनले बताए ।
उदाहरणका लागि हार्लमको १२५ औं स्ट्रिटमा रहेको मुश्तारी हार्डवेयरले पछिल्लो दुई हप्तादेखि आफ्नो निगरानी क्यामेरा सीधा न्युयोर्क प्रहरीमा लिङ्क गरेको छ। प्रहरीले ती भिडियोमार्फत चोरी गर्ने जो कोहीलाई पनि देख्न र पहिचान गर्न सक्छ ।
१२५ औं स्ट्रीटका ठूला र साना व्यवसायहरूलाई यो कार्यक्रममा समावेश हुन आमन्त्रित गरिएको छ । यो कार्यक्रम अन्तरगत राउटर जस्तो देखिने बाकस जोडेपछि प्रहरीले त्यहाँका क्यामेरामाहरुमा लाइभ पहुच पाउने छ । यो जोड्ने खर्च स्थानीय सरकारले बेहोर्नेछ ।
यो वर्ष हालसम्म न्युयोर्क सिटीभरि खुद्रा चोरीका घटनामा वृद्धि भएको छ। २०२३ को तुलनामा ५ प्रतिशत बृद्धि भइसकेको प्रहरीले रिपोर्ट गरेको छ । पछिल्लो प्रहरी तथ्याङ्क अनुसार २०२४ मा २१ हजार भन्दा बढी खुद्रा चोरीका घटनाहरू रिपोर्ट गरिएका छन्।
त्यसलाई रोक्न स्टोरका क्यामेरामा प्रहरीको पहुच हुने हाईटेक कार्यक्रम क्वीन्समा सुरु भएको थियो । तर अब न्युयोर्क सिटीले हार्लम सहित प्रहरीका थप नौ क्षेत्रमा विस्तार गर्न डेढ मिलियन डलर लगानी गरिरहेको छ।