धेरै देशमा विना भिसा जानसकिने पासपोर्टको सुची, अमेरिका छैठौंमा, नेपाल कतिमा ?
प्रकाशित मिति : भाद्र ३०, २०७६ सोमबार
इन्टरनेशनल एयर ट्रान्सपोर्ट एसोसिएसनले धेरै देशमा विना भिसा जान सकिने पासपोर्टको आधारमा सुची सार्वजनिक गरेको छ । धेरै देशमा विना भिसा जान सकिने आधारमा जापान र सिंगापुर पहिलो नम्बरमा छन् ।
यी देशका पासपोर्ट वाहकहरु विश्वका १८९ गन्तब्यमा पहिले नै भिसा नलिइकन यात्रा गर्न सक्छन् । अर्थात् उनीहरुले एयरपोर्टमा नै उक्त देशमा प्रवेशका लागि अनुमति प्राप्त गर्नसक्छन् ।
सुचीमा अमेरिका र बेलायत छैठौं नम्बरमा रहेको छ । यी देशका नागरिकहरुलाई १८३ गन्तब्यमा यात्रा गर्नका लागि पहिले नै भिसा लिनु पर्दैन । अमेरिकाको तुलनामा पोर्चुगलको पासपोर्टमा धेरै देशमा पहिले नै भिसा नलिइकन यात्रा गर्न सकिन्छ ।
यो सुचीमा नेपाल भने १ सय २ नम्बरमा रहेको छ । नेपालको पासपोर्टबाट पहिले नै भिसा नलिइकन यात्रा गर्न सकिने गन्तब्यहरु ३८ रहेका छन् । एसियामा बंगालादेश, भारत, कम्बोडिया, इन्डोनेशिया, लाओस, मालदिभ्स, पाकिस्तान, फिलिपिन्स, सिंगापुर र टिमोर लेष्टमा यात्रा गर्नका लागि नेपाली पासपोर्टबाहकलाई पहिले नै भिसा लिनु पर्दैन भने श्रीलंकमा अनलाइनबाट भिसा लिएर जान सकिन्छ ।
त्यस्तै अफ्रिकाका केप भर्ड आइल्याण्ड, कोमोरेश आइल्याण्ड, इजिप्ट, गाम्बिया, गायना बिसउ, केन्या, माडागास्कर, मौरिटानिया, मौरिसस, मोजाम्बिक, रुवाण्डा, सेनेगल, सेचेलिस, सोमालिया, तान्जिनिया, टोगो र युगाण्डाको भ्रमण गर्नका लागि पनि नेपालीलाई पहिले नै भिसा लिनु पर्दैन ।
ओसियानाका कुक आइल्याण्ड, माइक्रोनेसिया, निउ, पलाउ आइल्याण्ड, सामोआ र तुभालुको भ्रमण गर्न पनि नेपाली पासपोर्ट वाहकले पहिले नै भिसा लिनु आवश्यक पर्दैन । त्यस्तै क्यारेबियनमा डोमेनिका, हैटी र सेन्ट भिन्सेन्टको यात्रागर्न नेपालीलाई पहिले नै भिसा लिनु पर्दैन । अमेरिकाको बोलिभिया पनि पहिले नै भिसा नलिइ नेपालीहरु जान सक्छन् ।
तर विश्वका १८८ गन्तब्यमा जानका लागि नेपाली पासपोर्टबाहकले पहिले नै भिसा लिनु जरुरी हुन्छ ।