मिस नेपाल युएस अक्टोबर १२ मा, कोरियोग्राफर मिस नेपाल युनिभर्स नग्मा श्रेष्ठ
प्रकाशित मिति : भाद्र १७, २०७६ मंगलबार
मिस नेपाल युएस आगामी अक्टोबर १२ मा नेब्रास्कामा हुने भएको छ । नेब्रास्का नेप्लिज सोसाइटीको आयोजना र मिस नेपाल यूएसको संरक्षणमा मिस नेपाल युएसको सातौं संस्करण हुन लागेको हो ।
अमेरिकामा रहेका १९ देखी २९ बर्ष उमेर समुहका नेपाली युवतीहरुले प्रतियोगितामा भाग लिन पाउनेछन् । आवेदन खुल्ला भएकाले इच्छुकलाई सहभागिता जनाउन आयोजकले आग्रह गरेका छन् । सहभागी हुन चाहनेले सेप्टेम्बर २२ सम्म आवेदन दिन पाउँछन् ।
सौन्दर्य प्रतियोगितालाई बिगतका बर्षहरु भन्दा अझै बढी प्रभावकारी र स्तरिय बनाउने प्रयास जारी रहेको आयोजकको भनाई छ । मिस नेपाल युएसको सातौं संस्करणको कोरियोग्राफी मिस नेपाल युनिभर्स २०१७ बिजेता नग्मा श्रेष्ठले गर्ने भएकी छिन् । साथै फाइनल चरणका लागि कार्यक्रम उदघोषण पनि उनले गर्नेछिन् ।
नग्माले सन् २०१७ मा लसभेगसमा सम्पन्न अन्तराष्ट्रिय स्तरको सौन्दर्य प्रतियोगिता मिस युनिभर्समा नेपालको प्रतिनिधित्व गरेकी थिइन् । साथै फिलिपिन्समा सम्पन्न सौन्दर्य प्रतियोगितामा समेत उनले नेपालको प्रतिनिधित्व गरेकी थिइन् । त्यहाँ उनि उत्कृष्ट ८ मा पुगेकी थिइन् । यस्तै उनि २०१६ मा चिनमा भएको प्रतिस्पर्धामा थर्ड रनर वल्ड मिस युनिभर्सको उपाधि समेत जितेकी थिइन् ।
यस्तै नग्माले वेष्ट टुरिजम भिडियो अवार्ड प्राप्त गरेकी थिइन् भने इजिप्टमा भएको मिस इको यूनिभर्स २०१६ मा समेत सहभागिता जनाएकी थिइन् । सन् २००९ देखी उनी इमेज च्यानलमा कार्यक्रम प्रस्तोताका रुपमा छिन् । साथै उनी प्रतिभावान कार्यक्रम निर्माता तथा प्रस्तोताको रुपमा चिनिन्छिन् ।