अमेरिकामा एसाइलम गर्न अर्को देशमा एसाइलम अस्वीकृत हुनुपर्ने नियम कार्यान्वयनका लागि सर्बोच्चमा
प्रकाशित मिति : भाद्र १०, २०७६ मंगलबार
सोमबार अमेरिकी राष्ट्रपति डोनाल्ड ट्रम्पको प्रशासनले सर्बोच्च अदालतसमक्ष तेश्रो देशमा एसाइलम अस्वीकृत भएको व्यक्तिलेमात्र अमेरिकामा आएर एसाइलम गर्न पाउने नियम कार्यान्वयनको माग गरेको छ । सिमाक्षेत्रमा आएर एसाइलम गर्नका लागि बाटोमा पर्ने अर्को मुलुकमा एसाइलम अस्वीकृत भएको हुनुपर्ने प्रावधान ट्रम्प प्रशासनले ल्याएको थियो ।
उक्त प्रावधान कार्यान्वयन नगर्न गत महिना क्यालिफोर्नियाका न्यायाधिस जोन टाइगरले देशब्यापी आदेश दिएका थिए । त्यसपछि सान फ्रान्सिस्को क्षेत्रको नाइन्थ सर्किट कोर्टले पनि संघीय न्यायाधिसको आदेशलाई नै सही ठहर गरेको थियो । तर नाइन्थ सर्किट कोर्टको क्षेत्राधिकार नौवटा पश्चीमी राज्यहरुमात्र रहेकाले सर्किट कोर्टको आदेश ती राज्यहरुमा मात्र लागु भएको थियो ।
नौमध्ये क्यालिफोर्निया र एरिजोनामा मेक्सिकोसँग सिमा जोडिएका राज्यहरु हुन् । जसका कारण ट्रम्प प्रशासनको नियम टेक्सास र न्यु मेक्सिकोसँग सिमा जोडिएका क्षेत्रमा लागु हुने सम्भावनालाई जीवितै छाडेको थियो ।