रवि लामेछानेसहितको मुद्दामा सकियो कानुन व्यवसायीको बहस, अदालतको आदेश बाँकी
प्रकाशित मिति : भाद्र ९, २०७६ सोमबार
थुनामा रहेका टेलिभिजन कार्यक्रम प्रस्तोता रवि लामिछानेसहित तीन जनाको मुद्दामा सोमबार जिल्ला अदालत चितवनमा कानुन व्यवसायीको बहस सकिएको छ । लामिछानेसहितका तीन जनालाई पत्रकार सालिकराम पुडासैनी आत्महत्या दुरुत्साहन अभियोगमा पक्राउ गरिएको थियो ।
अदालतमा दुबै पक्षका करिब एक दर्जन कानुन व्यासायीले बहस गरेका थिए । थुनछेक बहस सकिए पनि अदालतको आदेश आउन बाँकी रहेको जनाइएको छ । धेरै कानुन व्यवासायी भएकाले बहस सकिन समय लागेको जनाइएको छ ।
पुडासैनीलाई आत्महत्या गर्न दुरुत्साहन गरेको अभियोगमा लामिछाने, युवराज कँडेल र अस्मीता भन्ने रुकु कार्कीमाथि जिल्ला सरकारी वकिल कार्यालयले ५ वर्ष कैद र ५० हजार जरिवाना मागदावी गर्दै आइतबार जिल्ला अदालतमा अभियोगपत्र दायर गरेको थियो ।
अदालतले प्राप्त प्रमाणको आधारमा साधारण तारेख, धरौटी माग वा पुर्पक्षका लागि थुनामा राख्ने मध्ये जुनसुकै आदेश गर्न सक्ने छ ।