बेलहिया –बुटवलमा अपाङ्गतामैत्री आकाशे पुल
प्रकाशित मिति : भाद्र ६, २०७६ शुक्रबार
सिद्धार्थ राजमार्ग अन्तर्गतको बेलहियादेखि बुटवलसम्मको छ लेन सडकमा नौ वटा आकाशे पुल निर्माण सम्पन्न भइसकेका छन् भने बाँकी ११ वटा बन्ने क्रममा छन् ।
साँढे २७ किलोमिटरको उक्त क्षेत्रलाई बेलहिया बुटवल छ लेन व्यापारिक मार्ग पनि भनिन्छ । बेलहिया बुटवल छ लेन व्यापारिक मार्ग आयोजनामार्फत नै उक्त पुल निर्माण भएका हुन् । पूर्णतया अपाङ्गमैत्री रहेका हरेक आकाशे पुल ३० मिटर लम्बाइ, साँढे २ मिटर चौडाइ र ५ मिटर उचाइका छन् । उक्त आकाशे पुलमा ढलानसहितको बेस बिममाथि स्टिलको रड र रेलिङसमेत राखिएको छ । पुलको दुवै तर्फ सोलार बत्ती जडान भएका छन् ।
बेलहियादेखि बुटवलसम्मको सडकखण्ड अन्तर्गत आँखा अस्पतालचोक, देवकोटाचोक र ब्रमेलीटोलचोक भैरहवामा आकाशे पुल निर्माण भइसकेको छ । यसैगरी तिलोत्तमा नगरपलिका अन्तर्गतको ड्राईभर टोल र बुटवलका जोगीकुटि, होराइजनचोक, कालीका स्कुल अगाडि, राजमार्ग चौराहा, मिलनचोकमा आकाशे पुल निर्माण सम्पन्न भई प्रयोगमा आइसकेकोे बेलहिया बुटवल व्यापारिक मार्ग आयोजनाका प्रमुख इञ्जिनीयर जीवेन्द्र मिश्रले बताउनुभयो ।
साँढे २७ किलोमिटर दुरीको बेलहिया बुटवल सडक रु पाँच अर्ब ८६ करोडकोलागतमा निर्माण भइरहेको छ । उक्त आयोजना अन्तर्गत नै २० वटा आकाशे पुल बनाउन थालिएको हो । बाँकी पुल दुई महीनाभित्र ठेक्का प्रक्रिया शुरु गरी निर्माणकार्य अगाडि बढाइने इञ्जिनीयर मिश्रले बताउनुभयो ।
उहाँले भन्नुभयो,“यात्रुको चाप र दुर्घटना सम्भावित क्षेत्रलाई मध्यनजर गर्दै बाँकी कहाँ कहाँ राख्ने भन्ने अध्ययन गरेर अरु आकाशे पुल निर्माण गरिनेछ ।”
–––