एकसातामा २५ हजार बढीलाई अमेरिकी नागरिकता दिइदै
प्रकाशित मिति : फाल्गुन ४, २०७३ बुधबार
अमेरिकी सरकारको युएस सिटिजनसिप एण्ड इमिग्रेशन सर्भिस आगामी फरबरी २२ सम्म २५ हजार जनालाई अमेरिकी नागरिकता प्रदान गर्ने जनाएको छ । प्रेसिडेण्ट डेको अवशरमा युएससीआईएसले फरबरी १४ देखि नागरिकता वितरण समारोह सुरु गरेको छ भने यो फरबरी २२ सम्म चल्नेछ । त्यसका लागि अमेरिकाभर १६२ वटा नागरिकता वितरण तथा सपथग्रहण कार्यक्रम राखिएको छ । २५ हजार भन्दा धेरै नयाँ अमेरिकी नागरिकहरुलाई स्वागत गर्न पाएकोमा आफूलाई निकै खुशी लागेको युएससीआईएसका कार्यकारी निर्देशकले बताएका छन् ।
कुनै पनि व्यक्ति अमेरिकाको नागरिक हुनका लागि १८ बर्ष पुगेको, केही अपवाद बाहेक ग्रिनकार्ड प्राप्त गरेको ५ बर्ष पुगेको, आवेदन दिएको राज्य वा जुरिडिक्सनमा कम्तीमा ३ महिनादेखि बस्दै आएको, ग्रिनकार्ड प्राप्त गरेको पाँचबर्षको अवधिमा अमेरिकाभित्र कम्तीमा ३० महिना भौतिकरुपमा बसेको, नागरिकताको लागि आवेदन दिएपछि नागरिकताप्राप्त गर्नेमितिसम्म अमेरिकामा बसिरहेको, अँग्रेजी भाषा बोल्न लेख्न र पढ्न सक्ने, राम्रो चारित्रिक रेकर्ड भएको लगायतका मापदण्ड पूरा गर्न जरुरी हुने युएससीआईएसले जनाएको छ ।
अमेरिकी नागरिकसँग बिहे गर्नेहरु भने ग्रिनकार्ड प्राप्त गरेको ३ बर्षमा नै नागरिकताको आवेदनका लागि योग्य हुन्छन् । त्यस्तै अमेरिकी अमेरिकी सेनामा भर्ना भएमा वा अमेरिकी सेनाको दम्पत्ति वा बच्चाबच्ची भएमा भने नागरिकताको प्रकृया अझ छिटो हुनसक्नेछ ।