राष्ट्रसंघमा नेपाल र इसिमोडको छलफल, डेढ अर्बको जीवनमा जलवायु परिवर्तनको प्रभाव पर्ने चेतावनी
प्रकाशित मिति : असार २४, २०७६ मंगलबार
संयुक्त राष्ट्रसंघका लागि नेपाली स्थायी नियोग न्युयोर्क र इसिमोडले हिमालयहरुमा वातावरण परिवर्तनको प्रभावबारे छलफल कार्यक्रमको आयोजना गरेका छन् । राष्ट्रसंघको उच्च स्तरीय राजनीतिक मञ्च अन्तरगत राष्ट्रसंघ मुख्यालय न्युयोर्कम साइड इभेन्टका रुपमा उक्त छलफल आयोजना गरिएको हो ।
कार्यक्रममा राष्ट्रसंघका लागि नेपाली स्थायी प्रतिनिधि राजदूत अमृतबहादुर राईले कार्यक्रममा सहभागीहरुलाई स्वागत गर्दै आगामी सेप्टेम्बरमा राष्ट्रसंघ महासचिवको क्लाइमेट एक्सन सम्मेलनमा यो छलफलले योगदान दिने बताउनुभयो । राष्ट्रीय योजना आयोगका उपाध्यक्ष पुष्पराज कँडेलले नेपालजस्ता मुलुकले वातावरण परिवर्तनको प्रभाव उच्चस्तरमा सामना गरिरहेको बताउनुभयो ।
इसिमोडका डाइरेक्टर जनरल डेभिड मोल्डेनको प्रिजेन्टेशन कार्यक्रमको मुख्य आकर्षण रहेको थियो । उहाँले जलवायु परिवर्तनको सन्दर्भमा आवश्यक कदम नचालिएमा हिमाली क्षेत्रमा बसोबास गर्ने २४० मिलियनको मात्र नभई १६ सय मिलियनको जीवनमा प्रभाव पार्ने चेतावनी दिनुभयो । हिमालमा हिउँ पग्लिदा र ग्लेसियरहरु नष्ट हुँदा कृषि उत्पादन, भोकमरी, गरिबी, बसाइसराई, जैविक विविधता र इकोसिस्टममा नकारात्मक असर पर्ने उहाँले चेतावनी दिनुभयो ।
ग्लोबल वार्मिंग सन् २१०० सम्म १ दशमलव ५ डिग्री सेल्सियसमा सिमित रहेपनि पूरै क्षेत्रमा १ दशमलव ८ डिग्री सेल्सियससम्म तापक्रम बृद्धि र हिमाली क्षेत्रमा २ दशमलव २ डिग्री सेल्सियससम्म तापमान बृद्धि हुने उहाँको भनाई थियो । छलफलको संचालन संयुक्त राष्ट्रसंघका पूर्व उप महासचिव ज्ञानचन्द्र आचार्यले गर्नुभएको थियो ।
छलफलमा क्लाइमेट एक्सन समिट २०१९ का लागि महासचिवका विशेष दूत लुई अल्फोन्सोले समापन मन्तब्य दिदै समयमै कार्यक्रमको आयोजना गरेकोमा नेपाल र इसिमोडलाई धन्यवाद दिनुभएको थियो ।
