अमेरिकी विमान कम्पनीले चेतावनी दिँदै भन्यो : ३ सय बढी विमानहरूको पखेटामा समस्या हुन सक्छ
प्रकाशित मिति : जेष्ठ २२, २०७६ बुधबार
अमेरिकी विमान निर्माता कम्पनी बोइङले केही ७३७ विमानका पखेटामा समस्या हुनसक्ने चेतावनी दिएको छ । बोइङले विश्वभरका ३ सय भन्दा बढी विमानहरूको विङ्ग स्लट्स भनिने भागमा सम्भावित त्रुटी रहेको पहिचान गरेको छ ।
विङ्ग स्लट्सले उडान र अवतरणका बेला जहाजको गतिलाई व्यवस्थापन गर्ने काम गर्छ ।अमेरिकी उड्डयन नियामकले प्रभावित भागहरू असफल हुन वा चर्कन सक्ने बताएको हो ।
संघीय उड्डययन प्रशासनिक प्राधिकरण एफएएले अनुपयुक्त निर्माण प्रक्रियाका कारण समस्या देखापरेको जनाएको छ । बोइङको पखेटामा सम्भावित समस्या रहेको खबर आएपछि उक्त कम्पनीको शेयर मूल्यमा समेत गिरावट आएको छ ।
दुईवटा दुर्घटनापश्चात ७३७ म्याक्स जहाजको संसारभर उडान बन्द भएर समस्यामा रहेको बोइङ कम्पनीको विमानहरूमा यस्ता समस्याहरू देखिएका हुन् ।