राष्ट्रपति भण्डारीले राजाले जस्तै ‘मेरो सरकार’ भनेर सम्बोधन गरेपछि विरोध
राष्ट्रपति विद्यादेवी भण्डारीले नीति तथा कार्यक्रम सम्बोधनमा नेपाल सरकारको सट्टा ‘मेरो सरकार’ भनेपछि विरोध भएको छ । गत वर्षसम्म राष्ट्रपतिले गर्ने सम्बोधनमा ‘यो सरकार’ र ‘नेपाल सरकार’ भनिएको थियो। पूर्व राष्ट्रपति रामवरण यादवले संसदमा गरेका सम्बोधनमा पनि नेपाल सरकार नै भनेका थिए ।
राजतन्त्रका बेलामा भने राजाले गर्ने सम्बोधनमा मेरो सरकार भन्ने गर्थे। गणतन्त्र स्थापनापछि पहिलोपटक राष्ट्रप्रपतिले पनि राजाले जस्तै मेरो सरकार भनेर सम्बोधन गरेपछि विरोध भइरहेको छ ।
नेपाली काँग्रेस, साझा विवेकशिल लगायतका दलका नेताहरुले सामाजिक सञ्जालहरुमार्फत यसको विरोध गरेका छन् भने सामाजिक सञ्जालमा सर्वसाधारणहरुले पनि यसको विरोध र टिकाटिप्पणी गरेका छन् ।
नीति तथा कार्यक्रम नेपाल सरकारले नै तयार पार्छ। सम्बोधनअघि संसद बैठकमै प्रधानमन्त्रीले नीति तथा कार्यक्रम राष्ट्रपतिलाई हस्तान्तरण गर्छन्। त्यसैले यसमा लेखिने भाषा र सम्बोधन सरकारले नै तयार पार्छ।
त्यसैले यसमा लेखिएको भाषा र सम्बोधनबारे राष्ट्रपतिलाई पूर्वजानकारी नहुने भएकाले राष्ट्रपतिले जे लेखिएको हो त्यही नै खुरुखुरु पढ्ने प्रचलन रहेको छ ।
