अर्घाखाँचीमा तीनघण्टा हिडेर स्कुल पुग्ने बाला अमेरिकामा मेयरको सल्लाहकार समितिसम्म
प्रकाशित मिति : बैशाख ९, २०७६ सोमबार
‘विद्यालय जान र आउनमात्र ६ घण्टाजति लाग्थ्यो । विहान सातै बजेर खानाखाएर विद्यालयका लागि दौडनुपथ्र्यो भने बेलुका घर आइपुग्दा राती भइसक्थ्यो ।’ स्कुले जीवनका संघर्षपूर्ण दिनहरु यसरी सम्झिन्छन् अमेरिकाको शिकागोमा सफल व्यवसायीका रुपमा दरिइसकेका बाला घिमिरे । अर्घाखाँचीको खनमा जन्मिएका घिमिरेले कक्षा ७ देखि १० सम्म घरदेखि पैदल हिडेर तीनघण्टा टाढा रहेको हंशपुरको विद्यालयमा अध्ययन गरे ।
गर्मीको समयमा त रातीघरमा आइपुग्दा उज्यालो नै हुन्थ्यो तर जाडोको समयमा भने अँध्यारो र जाडोका कारण घरमा आइपुग्न सम्भव थिएन । त्यसैले कहिले छात्रावासमा बस्दै त र कहिले घरबाट आउने जाने गर्दै उनले एसएलसीसम्मको अध्ययन अर्घाखाँचीबाटै सकाएका थिए ।
२०२४ सालमा अर्घाखाँचीको खनमा बुबा रविलाल घिमिरे र आमा सुमित्रा घिमिरेको राईलो सन्तानका रुपमा जन्मिएका थिए बाला । सामान्य आर्थिक हैसियत भएको परिवारमा सातभाई छोरामध्येका पाँचौं सन्तानका रुपमा जन्मे हुर्केका घिमिरेको बाल्यकाल पनि संघर्षमै बितेको थियो । कक्षा सातसम्म भने खनदहको स्कुलमा पढेका उनलाई त्यहाँ पुग्न पनि हिडेर झण्डै एकघण्टा नै लाग्थ्यो ।
बर्षामा जुका र हिउँदमा सिरेटोको सामना गर्दै कक्षा १० सम्मको अध्ययन सकाएका घिमिरे एसएलसीपछि भने दिल्ली गए । दिल्लीमा दाजुहरु भएका कारण उनले अध्ययनपनि त्यही नै गरे । दिल्ली विश्वविद्यालबाट स्नातकोत्तर सम्मको अध्ययन गर्ने क्रममा उनी बामपन्थी राजनीतिमा सकृय बने । भारतमा छँदा प्रवासी नेपाली संघमा काम गर्दै नेपालको प्रजातान्त्रिक आन्दोलनमा सघाउने क्रममा उनले त्यहाँ कैयन पटक भारतीय प्रहरीका डण्डा समेत खानुपरेको थियो । झण्डै तीनपटक त उनी थुनामा समेत परे ।
दिल्लीबाट फर्केपछि उनी काठमाडौंमा बापन्थी राजनीतिमा सकृय भए । मनमोहन अधिकारीको निर्वाचन क्षेत्रमा सकृय भएका उनका झण्डै तीनबर्ष काठमाडौंमा राजनीतिक गतिविधिमा लाग्दैमा बिते ।
त्यसपछि सन् १९९७ मा अमेरिकन ड्रिम बोकेर बाला घिमिरे पनि विश्वकै आर्थिक राजधानीका रुपमा परिचित अमेरिकाको न्युयोर्क शहरमा पाइला टेके । मनभरी कैयन सपना बोकेर विश्वका सातै महादेशका आप्रवासीहरु खचिखचाउ न्युयोर्कमा आइपुगेका घिमिरे त्यहाँ भने धेरै टिक्न सकेनन् । झण्डै एकमहिनाको न्युयोर्क बसाईपछि उनी शिकागोतिर लागे ।
अमेरिकाको सुरुको बसाई सहज थिएन । कागजपत्र नभएका कारण सुरुमा लुकेर काम गर्नुपर्ने बाध्यता थियो । अमेरिकामा सुरुवाती दिनहरु सम्झदै उनी भन्छन् –‘सुरुमा लुकी लुकी र डराई डराई रेष्टुरेण्टमा काम गरें । झण्डै तीनबर्ष कागजपत्रविहिन भएर अरुको रेष्टुरेण्टमा काम गर्ने दौरानमा मैले जीवनमा संघर्ष के हो भन्ने कुरालाई थप बुझें ।’
तर पनि उनले हिम्मत भने हारेनन् । सन् २००० मा ग्रिनकार्ड स्वीकृत भइसकेपछि उनको मनोवल बढ्यो । उनले थप ४ बर्ष अरुकै रेष्टुरेण्टमा काम गरेर केही रकम जम्मा गरे । त्यसपछि सन् २००४ मा साथीहरुसँग मिलेर शिकागोमा करिहट नामको रेष्टुरेण्ट खोले । रेष्टुरेण्ट बिजनेशमा सफल बन्दै गएका उनले २००८ मा डाउनटाउनमा शिकागो करी हाउसस्थापना गरे । त्यसपछि सन् २०१३ मा नेपाल हाउस वान र २०१६ मा नेपाल हाउस २ स्थापना गरे । निरन्तरको मिहिनेतका कारण एकपछि अर्को सफलताको सिंढी चढ्दै गएका उनका अहिले शिकागोमा तीनवटा रेष्टुरेण्ट संचालनमा रहेका छन् ।
श्रीमति कमला घिमिरे र छोराहरु विशाल र कुशलका साथमा शिकागोमा बस्दै आएका घिमिरे व्यवसायमा मात्र सफल भएनन्, चर्चित नेपाली सामाजिक अभियन्ताका रुपमा समेत अमेरिकामा दरिन पुगेका छन् । रेष्टुरेण्ट व्यवसाय सुरु गरेदेखि नै उनी सामाजिक गतिविधिमा पनि समानान्तर रुपमा लागिरहे । २००५ देखि नै शिकागोका स्थानीय सामाजिक संघसंस्थामा सकृय बने उनी ।
२००९ देखि अहिलेसम्म नै सिटी अफ शिकागोका मेयरको एड्भाइजरी काउन्सिल सदस्यका रुपमा रहेका छन् घिमिरे । त्यस्तै २००९ देखि अहिलेम्म नै सेक्रेटरी अफ स्टेटको एड्भाइजरी काउन्सिलमा समेत उनी रहेका छन् । सामाजिक कार्यमा सकृय भएकै कारण उनले तत्कालिन राष्ट्रपति बराक ओबामाबाट हस्ताक्षरित प्रमाणपत्र समेत प्राप्त गरेका थिए । अमेरिकन एड्भाइजरी काउन्सिलको कम्युनिटी सर्भिस अवार्ड र एसियन कोर्निकल अमेरिकाबाट एसियन एक्जामपलरी सर्भिस अवार्ड पाइसकेका घिमिरेले स्थानीय अमेरिकी राजनीतिज्ञहरुसमेत पहुच कायम गर्दै नेपाली समुदायको हितमा विभिन्न सामाजिक तथा राजनीतिक गतिविधिमा सहभागी हुँदै आइरहेका छन् ।
२०१० मा अमेरिकाको पुरानो संस्था एएनएमा केन्द्रीय सदस्य समेत भएर काम गरेका घिमिरेले नेपलिज एसोसिएसन इन साउथवेष्ट अमेरिकामा कोषाध्यक्ष भएर काम गरे । त्यस्तै २०१० देखि नै एसोसिएसन अफ नेपलिज इन मिडवेष्ट अमेरिकामा सकृय उनी २०१६ देखि २०१८ सम्म त्यही संस्थाको अध्यक्ष बने । २०१८ मा एसोसिएसन अफ नेपलिज इन मिडवेष्ट अमेरिका, नेपलिज एसोसिएसन इन साउथवेष्ट अमेरिका र एसोसिएसन अफ नेपलिज इन अमेरिकाको संयुक्त नेपाली नेशनल कन्भेन्सनको कन्भेनरका रुपमा रहेर उनले सफलताका साथ कार्यक्रम सम्पन्न गरेका थिए ।
सन् २०१६ देखि नेपाल सरकारका पर्यटनदूतका रुपमा समेत सकृय घिमिरेले नेपालको कला, संस्कृति, खाना र पर्यटनको प्रवद्र्धन गर्दै नेपाल चिनाउने अभियानमा समेत सकृय छन् । रोटरी क्लब, लायन्स क्लब जस्ता संस्थामा सहभागी भई काम गरेका उनी एनआरएनए आईसीसीको सिटीजनसिप टास्क फोर्समा सदस्य समेत रहे भने मानवीय समितिको सहसंयोजक बने । अहिले एनआरएएन आईसीसीकोे नीति र प्रकृया समितिको सहसंयोजक घिमिरे सन् २०१७ सम्म तीनबर्ष प्रवासी नेपाली मञ्चको बरिष्ठ उपाध्यक्ष समेत बने ।
शिकागोको ह्युमन रिलेशन कमिटिमा झण्डै ५ बर्ष काम गरेका बाला घिमिरेले अमेरिकामा कुनै नेपालीहरुलाई समस्या पर्दा गरेको सहयोगको फेहरिस्त पनि निकै लामो छ । त्यस्तै नेपालमा कसैलाई समस्या पर्दा वा बिपत्ति आउँदा पनि उनी सहयोगका लागि अगाडि सर्ने गर्छन् । तर उनी भन्छन् –‘अरुलाई गरेको मानवीय सहयोगको हिसाबकिताब र सुची राखेको छैन । हिसाबकिताब र सुची तयार गरेर यति सहयोग गरें भनेर प्रचार गर्न वा कतैबाट कुनै फाइदा लिनका लागि सहयोग गरेको पनि होइन । आफ्नो क्षमताले भ्याएसम्म सहयोग गर्छु । भविश्यमा पनि मानवीय र सामाजिक सहयोगमा लागिरहनेछु ।’