जेलमा रहेका एसाइलम आवेदकलाई अब धरौटीमा नछाडिने, पहिले छाडिएकालाई पनि जेलमा राख्न सकिने
प्रकाशित मिति : बैशाख ३, २०७६ मंगलबार
एसाइलमको क्रेडिबल फियर अन्तरवार्ता उत्तिर्ण गरिसकेर पूर्ण सुनुवाईको प्रतिक्षा गरिरहेका एसाइलम आवेदकलाई बण्डमा नछाड्ने महान्यायाधिवक्ता विलियम बारले नयाँ रुलिङ गरेका छन् । यो रुलिङ पछि सिमाक्षेत्रबाट प्रवेश गरेर अध्यागमन जेलमा सुनुवाई कुरिरहेकाहरुलाई अब बण्डमा नछाडिने भएको छ ।
अब सिमाक्षेत्रबाट प्रवेश गरेर क्रेडिबल फियर अन्तरवार्ता उत्तिर्ण गरेकाहरुलाई अनिवार्य रुपमा अध्यागमन जेलमा राखिने भएको छ । नयाँ रुलिङबाट अमेरिकामा एसाइलम खोज्ने हजारौं प्रभावित हुने बताइएको छ ।
एनबीसी न्युजमा प्रकाशित रिपोर्ट अनुशार बण्ड प्राप्त गरेर जेलबाहिर रहेरै एसाइलमको निर्णय कुरिरहेकाहरुलाई पनि अब अध्यागमन जेलमा राखिनेछ । र उनीहरुले जेलभित्रै बसेर आफ्नो एसाइलमको सुनुवाई प्रतिक्षा गर्नुपर्नेछ । एसाइलम सुनुवाईका लागि चर्को ब्याकलगका कारण महिनादेखि बर्षौ कुनुपर्ने अवस्था रहेको छ ।
नयाँ रुलिङको कार्यान्वयन भने ९० दिनभित्र हुने भएको छ । अध्यागमन हिराशतमा धेरै आप्रवासीहरुलाई राख्ने क्षमता आइससँग नभएकाले बिस्ताराका लागि थप स्थान बनाउनका लागि यो समय प्रदान गरिएको जनाइएको छ ।
महान्यायाधिवक्ताको रुलिङको पूर्ण पाठ यहाँ पढ्नुहोला ।
अमेरिकी कानुन अनुशार अध्यागमन न्यायाधिसको फैसलालाई महान्यायाधिवक्ताले उल्टाउनसक्ने प्रावधान रहेको छ । विगतमा एसाइलमको सुनुवाई कुर्नेलाई बण्डमा रिहा गरिदै आएपनि महान्यायाधिवक्ताले त्यसलाई उल्टाइदिएका छन् ।
अमेरिकाका विना कागजात प्रवेश गरेकाहरुलाई सुरुमा शीघ्र प्रकृयाको देशनिकालामा राखिन्छ । क्रेडिबल फियर अन्तरवार्ताका क्रममा यदि उनीहरुले एसाइलम अफिसरलाई आफ्नो देशमा फर्कन खतरा रहेको चित्त बुझाउन सकेमा उसको मुद्दा न्यायाधिससमक्ष पेश हुने अवशर प्रदान गरिन्छ । यही प्रकृयाका क्रममा बण्ड सुनुवाईको आग्रह गरेमा त्यस्तो सुनुवाई प्रदान गरिने र अदालती सुनुवाईसम्मका लागि बण्डमा रिहा गरिदै आएको थियो ।
तर अब यो प्रकृयालाई महान्यायाधिवक्ताले उल्टाएका कारण एसाइलमको सुनुवाई कुर्नेहरु जेलमै बस्नुपर्ने भएकोछ । यद्यपी १८ बर्षभन्दा कम उमेरका बच्चाबच्चीसहितका परिवारका सन्दर्भमा भने यो नियम लागु हुनेछैन । किनभने संघीय अदालतको फैसलाले बालबालिकालाई २० दिनभन्दा धेरै हिराशतमा राख्नमा रोक लगाएको छ ।
अमेरिकाको अध्यागमन जेलहरुमा हाल झण्ड्रै ३ सय नेपालीहरु रहेका छन् । कैयन नेपालीहरु बण्डमा समेत रिहा भएर एसाइलमको सुनुवाई कुरिरहेका छन् ।
