नयांशक्ति पार्टी ‘नयां’ थपेर काठमाडौँमा खुल्ने म:म पसल होईन : डा. बाबुराम भट्टराई
प्रकाशित मिति : चैत्र २३, २०७५ शनिबार
नयांशक्ति पार्टीका संयोजक डाक्टर बाबुराम भट्टराईले सरकारले हालै सम्पन्न गरेको लगानी सम्मेलनको नयां शक्ति पार्टीले स्वागत गरेपनि सार्थक नभएको टिप्पणी गर्नु भएको छ ।
नयां शक्ति पार्टीले आज बुटवलमा गरेको पत्रकार सम्मेलनमा बोल्दै संयोजक भट्टराईले लगानी सम्मेलनमा देश बिदेशका मन्त्री वा प्रतिनिधी भेला हुंदैमा सम्मेलन सफल भएको मान्न नसकिने बताउनु भयो । उहांले राष्ट्रको आन्तरिक अवस्था सुदृढ गर्दै लगानीको बिश्वास बनाउन सके मात्र सम्मेलनले सार्थकता पाउने बताउंदै ब्यापार घाटा बढेको तथा बजेट कार्यान्वयन हुन नसकेको सरकार आफैले स्विकार गरेको अवस्थालाई सकारात्मक मान्न नसकिने बताउनु भयो ।
उहांले बिश्व समुदायमा एक दलिय परम्पराबादी कम्युनिष्ट राजनितीको सान्दर्भीकता सकिएको चर्चा गर्दै सत्तारुढ नेकपालाई कम्युनिष्ट नाम परिवर्तन गर्न सुझाव दिनु भयो । नितीमा सर्वहारा अधिनायकत्व त्याग्दै सम्पत्तीमा निजी स्वामित्वलाई स्विकार गरेपछि कम्युनिष्ट नाम राख्नुको अर्थ नरहने उहांको भनाई छ ।
उहांले बिश्वको वस्तुगत अवस्था र नेपालको राजनितीक बिश्लेषण गरि नयां शक्ति पार्टी गठन भएको बताउंदै बजारमा नयां नाम जोडेर मःम पसल जस्तो नयां पार्टी नबनेको स्पष्ट पार्नुभयो ।
सत्तामा रहेका दलहरु बाहेकका दलहरुसंग संयुक्त मोर्चा बनाएर अधिकार प्राप्तीका लागि संघर्ष गर्न आफुले पहल गरिरहेको बताउंदै नेता भट्टराईले पार्टीले गर्ने संघर्ष शान्तिपुर्ण र अहिंसात्मक हुने बताउनु भयो । बिप्लप नेतृत्वको नेकपाले भने जस्तो हिंसात्मक आन्दोलनको औचित्य नभएको उहांको भनाई छ ।