टेक्सासमा कार्यस्थलमा एकदशकयताकै ठूलो अध्यागमन छापा, २८० बढी कागजपत्रविहिन पक्राउ
प्रकाशित मिति : चैत्र २१, २०७५ बिहीबार
उत्तरी टेक्सासको टेलिकम्युनिकेशन मर्मत कम्पनीमा अमेरिकी अध्यागमनको छापामा २८० भन्दा धेरै कामदारहरु पक्राउ परेका छन् । इमिग्रेशन एण्ड कस्टम इन्फोर्समेन्ट आइसले काम गर्ने स्थानमा एकदशक यताकै सबैभन्दा ठूलो छापा मारेको जनाइएको छ ।
आइसको होमल्याण्ड सेक्युरिटी इन्भेस्टिगेशनका विशेष एजेन्ट क्याट्रिना बर्जरले यो आफूहरुका तर्फबाट कार्यस्थलमा गरिएको १० बर्षयताकै सबैभन्दा ठूलो छापा भएको पुष्टी गरेकी हुन् । कागजपत्रविहिनहरुलाई काममा लगाएको सुचना पाएपछि एजेन्सीले जनवरीदेखि नै अनुसन्धान सुरु गरेको उनले बताएकी छिन् ।
कम्पनीले जानाजान कागजपत्रविहिनहरुलाई काममा राखेको र कतिपयले नक्कली कागजात पेश गरेको जनाइएको छ । कागजपत्रहरुलाई नियन्त्रणमा लिएपछि उनीहरु आफूहरु अमेरिका छाडेर आफै स्वदेश फर्कन चाहेको भन्दै रोइकराई गरेका थिए ।
छापामार्ने क्रममा कम्पनीको मालिक वा मेनेजरलाई नियन्त्रणमा लिइएको वा नलिइएकोबारे केही बताइएको छैन । पक्राउ परेका कागजपत्रविहिनहरुलाई भने औठाछाप लिएर देशनिकालाको प्रकृयामा लगिने जनाइएको छ ।