नेपालको टीपीएसबारे मार्चभित्रै विशेष मागनिर्देशनको तयारीमा अमेरिकी सरकार
प्रकाशित मिति : फाल्गुन ३०, २०७५ बिहीबार
नेपाल र होण्डुरसको टीपीएस अस्थायी रुपमा कायम राख्न अमेरिकी सरकार सहमत भएपछि टीपीएसवाहकले कस्तो कदम चाल्ने भन्ने सन्दर्भमा अन्यौलता उत्पन्न भएको छ । टीपीएस कायम राख्न दिइएको मुद्दा विचाराधिन रहेको अवस्थाभर नेपाल र होण्डुरसको टीपीएस समाप्त नगर्ने विषयमा अमेरिकी सरकार सहमत भएको थियो ।
नेपाल र होण्डुरसको टीपीएस र वर्क परमिट अद्यावधिक राख्नका लागि अमेरिकी सरकारले १५ दिनभित्र मार्गनिर्देशनसहितको योजना सार्वजनिक गर्ने अपेक्षा गरिएको छ । कम्तीमा अब नेपालको टीपीएस आगामी जुन २४ मा भने समाप्त नहुने भएको छ । तर वर्क परमिट अद्यावधिक राख्न र टीपीएस कायम गर्ने टीपीएसवाहकले कस्तो कदम चाल्ने भन्ने बिषयमा सरकारले केहीदिनमा सुचना प्रकाशित गर्नेछ ।
सरकारको आधिकारिक मार्गनिर्देशन, आवेदनको डेडलाइन र अवस्था, वर्क परमिट थप्ने मिति र तरिका लगायतका विषयमा अमेरिकी सरकारले फेडरल रजिस्टरमा अप्रिलभरीमा नै आधिकारिक सुचना जारी गर्ने अपेक्षा गरिएको छ । सामान्यता टीपीएसको अवधि समाप्त हुनुभन्दा ४५ दिन अगाडि नै यस्तो सुचना फेडरल रजिस्टरमा प्रकाशन गरिन्छ ।
