जात्रै जात्रामा अतिथि, करिश्मा
प्रकाशित मिति : फाल्गुन २८, २०७५ मंगलबार
फिल्म जात्रै जात्रा मा सदाबहार अभिनेत्री करिश्मा मानन्धर, निर्देशक निश्चल बस्नेत र नायिका सारा शिर्पाइली केमियो भूमिकामा देखिने भएका छन् । ‘माया पिरिम’ बोलको गीतमा फिल्मका मुख्य पात्र बिपिन कार्की र बर्षा राउतसँगै उनीहरुको पनि नृत्य छ ।
साथमा, फिल्मका अर्का कलाकार रविन्द्र झा र रविन्द्र सिंह बाँनियालाई पनि गीतमा देख्न सकिनेछ । कविराज गहतराजले कोरियोग्राफी गरिरहेको फिल्म जात्रै जात्रा को यो गीतमा मनिषा पोखरेल र निशान भट्टराइको स्वर छ भने लेखु सहयात्रीको शब्द र कृष्ण भारद्धाजको संगीत छ । छायाँकन शिवराम श्रेष्ठको छायांकन छ । फिल्मको अहिलेसम्म प्रदर्शन मिति भने तय गरिएको छैन । प्रदिप भट्टराइले निर्देशन गरिरहेको फिल्मलाई रविन्द्र सिंह बाँनियाले निर्माण गरिरहेका छन् ।
यो फिल्म ‘जात्रा’को सिक्वेल हो । नायिका करिश्मा मानन्धरको अगाडि केही डर लागेको नायिका बर्षा राउतले बताइन् । यस्तै, नायिका करिश्मा मानन्धरले गीत मनपरेको र फिल्मको एउटा सदस्य बन्न पाउँदा खुशी लागेकाले आफूले यो गीतमा काम गरेको बताइन् । फिल्म ‘जात्रै जात्रा’को लोक गीत छायांकन गरिएको छ । गीतमा फिल्मका नायक विपिन कार्की र नायिका वर्षा राउतसँगै सदाबहार नायिका करिश्मा मानन्धर, निश्चल बस्नेत र सारा शिर्पाइलीको पनि नृत्य रहेको छ ।
बैवाहिक माहोलको गीतमा करिश्मा, निश्चल र साराको नृत्य मात्र रहेको छ । यो फिल्मसँग जोडिन पाउँदा करिश्मा मानन्धरले खुशी व्यक्त गरिन् । उनले भनिन, ‘यो फिल्म कहिले प्रर्दशन हुन्छ भन्ने पर्खाइमा थिएँ । फिल्मको गीतमा आफुलाई पनि देख्न पाउने भएपछि झ्न उत्साहित भएको छु ।
निश्चल बस्नेतले जात्रा फिल्म निकै मन परेको बताउँदै भने, ‘जात्राको मेकिङ्ग गर्दा जोडिने मौका पाएको थिएँ । मेकिङ्गको समयमै फिल्म राम्रो बनेको छ भन्ने लागेको थियो । यसको सिक्वेलमा जोडिन् पाउँदा निकै खुशि छु । साराले पनि यो फिल्मसँग जोडिन् पाउँदा खुशि व्यक्त गरिन् ।
फिल्मकी नायिका वर्षा राउतले करिश्मा मानन्धरसँग स्क्रिन सेयर गर्दा छायाँमा पर्न सक्ने डर आफुमा रहेको बताइन् । उनले भनिन्, ‘सदाबहार नायिकासँग स्क्रिन सेयर गर्दैछु । छायाँमा पर्छु भन्ने डर त छ तर केहि फरक गरेको छैन । जस्तो हुन्छ त्यस्तै नृत्य गरेको छु । करिश्मा दिदीलाई चुनौती दिनै सकिदैंन ।’