अमेरिकामा एसाइलम खोज्ने २४० जनालाई मेक्सिको फिर्ता
प्रकाशित मिति : फाल्गुन २८, २०७५ मंगलबार
अमेरिकामा एसाइलम खोज्ने २४० जनालाई अदालती सुनुवाईसम्मका लागि मेक्सिको फिर्ता पठाइएको छ । ट्रम्प प्रशासनको माइग्रेन्ट प्रोटेक्सन प्रोटोकल लागु भएयता २४० जनालाई मेक्सिको फिर्ता पठाइएको जनाइएको छ ।
क्यालिफोर्नियाको शान यिसिद्रो पोर्ट अफ इन्ट्रीमा आएर एसाइलम दावी गर्नेहरुलाई अमेरिकी सरकारले अदालती सुनुवाईसम्मका लागि मेक्सिको फिर्ता पठाउन थालेको हो । आगामी साताहरुमा अन्य पोर्ट अफ इन्ट्रीमा आएर एसाइलम दावी गर्नेहरुलाई पनि मेक्सिको पठाउन थालिने जनाइएको छ ।
शन यिसिद्रो पोर्ट अफ इन्ट्रीमा आएर एसाइलम दावी गर्नेको सुरुमा बायोग्राफिकल सुचनाहरु लिइन्छ । त्यसपछि आवेदकको अन्तरवार्ता लिइन्छ । आधारभूत स्वास्थ्य परिक्षण लगायतका प्रकृया पूरा गरिसकेपछि अदालती सुनुवाईसम्म मेक्सिकोमा कुर्न सक्ने वा नसक्ने विषयको निर्धारण गरिन्छ । यदि आवेदकले कुर्न सक्ने अवस्था भएमा मेक्सिको फिर्ता पठाउने गरिएको छ ।
योग्य एसाइलम आवेदकलाई अदालतमा उपस्थीत हुने मिति र स्थानबारे जानकारी दिइन्छ । साथै सस्तोमा वा निशुल्क कानुनी सहायताका उपायहरुबारे पनि अँग्रेजी र स्पेनिस भाषामा जानकारी दिइन्छ ।
आप्रवासीहरुले अमेरिकाको अध्यागमन प्रणालीमा खेल खेलेको र अदालतको सुनुवाई मितिमा उपस्थीत नभएर बेपत्ता हुने गरेको भन्दै अमेरिकी सरकारले मेक्सिको फिर्ता पठाउने नीति लागु गरेको हो । तर डिपार्टमेन्ट अफ जस्टिसको तथ्यांक अनुशार सन् २०१७ मा ८९ प्रतिशत एसाइलम आवेदकहरु सुनुवाईको मितिमा उपस्थीत हुने भएका थिए । आर्थिक बर्ष सन् २०१८ मा ९३ हजारले अमेरिकामा एसाइलम दावी गरेका थिए ।
