टीपीएस वाहकसहित २० लाखलाई ग्रिनकार्ड दिने विधयेक सदनमा, पारित भए १० हजार नेपाली लाभान्वित
प्रकाशित मिति : फाल्गुन २८, २०७५ मंगलबार
अमेरिकी प्रतिनिधिसभाका डेमोक्रेटिक सांसदहरुले मंगलबार सदनमा बृहत अध्यागमन प्रस्ताव पेश पेश गरेका छन् । यो प्रस्ताव पारित भएमा बाल्यकालमा अमेरिका आएका कागजपत्रविहिनसहित निकट भविश्यमा नै देशनिकालाको सामना गरिरहेका अस्थायी वर्क परमिट हुने २० लाख भन्दा धेरै आप्रवासीहरुले अमेरिकी नागरिकताका लागि आवेदन दिन पाउनेछन् ।
ड्रिम एण्ड प्रमिस एक्ट नाम दिइएको उक्त विधयेक डेमोक्रेटिक पार्टीले प्रतिनिधिसभामा नियन्त्रण कायम गरेको झण्डै दुईमहिनापछि सदनमा ल्याइएको हो । ह्वाइट हाउसले अर्बौ डलर सिमानामा पर्खाल र सिमा सुरक्षाका लागि बजेट प्रस्ताव घोषणा गरेको एकदिनपछि यस्तो प्रस्ताव सदनमा ल्याइएको हो ।
नयाँ विधयेकले बाल्यकालमा अमेरिका आएका डाकाले समेटेका आप्रवासीहरुलाई अमेरिकी ग्रिनकार्ड आवेदन दिनका लागि र अमेरिकी नागरिकताको बाटोमा लैजानका लागि मार्ग प्रसस्त गर्नेछ । त्यस्तै टीपीएस वाहक लगायत अस्थायी रुपमा वर्क परमिट प्राप्त गरिरहेकाहरुलाई पनि देशनिकाला हुनबाट जोगाउनेछ । विधयेकको मुख्य स्पोन्सर न्युयोर्कका डेमोक्रेटिक सांसदहरु यिभेट क्लार्क र नादिया भेलाजक्वेट रहेका छन् ।
डेमोक्रेटिक सांसद लुसिल रोयबल अलार्डले यो आफूहरुको ठूलो सरोकारको विषय रहेको बताएका छन् । यो विधयेक हाउसबाट पारित भएपनि सिनेटमा भने मुख्य अवरोध सृजना हुनसक्ने जनाइएको छ । किनभने सिनेटमा रिपब्लिकनहरुको बहुमत छ । यद्यपी सानो संख्यामा मात्र पनि रिपब्लिकनलाई सहमत गराउन सकेमा भने विधयेक पारित हुनसक्नेछ ।
विधयेक पारित भएमा कति आप्रवासीहरु लाभान्वित हुन्छन् भन्नेबारे केही स्पष्ट छैन । तर पनि २१ लाख आप्रवासीहरु लाभान्वित हुने अनुमान गरिएको छ । विधयेकले एल साल्भाडोर, नेपाल, हैटी, होण्डुरस, सोमालिया र अरु देशका टीपीएस होल्डरलाई समेत समेट्नेछ ।
विधयेकमा ड्रिमरहरुका लागि १० बर्षको शर्तसहितको ग्रीनकार्ड आवेदन दिन पाउने प्रावधान राखिएको छ । उनीहरुले दुईबर्षको पढाई पूरा गरेमा, तीनबर्ष काम गरेमा वा शैन्य सेवा गरेमा शर्तविनाको ग्रिनकार्ड आवेदन दिनसक्ने लगायतका प्रावधान रहेका छन् ।
कुनै अपराध गरेको व्यक्तिले भने ग्रिनकार्डका लागि आवेदन दिन पाउनेछैन । खासगरी एकबर्षभन्दा धेरै सजाय हुने अपराधमा दोषी ठहर भएको वा ९० दिनभन्दा धेरै जेल सजाय हुने तीन वा धेरै अपराधमा दोषी व्यक्तिले ग्रिनकार्डका लागि आवेदन दिन पाउनेछैनन् ।
त्यस्तै टीपीएसमा रहनेहरुले तत्काल ग्रिनकार्डका लागि आवेदन दिनसक्नेछन् । तर त्यसका लागि उनीहरु कम्तीमा तीनबर्षदेखि अमेरिकामा रहेको हुनुपर्नेछ । उनीहरुको पनि अपराधको पृष्ठभूमि हुनुहुने छैन । दुबै प्रकारका आप्रवासीले ५ बर्ष ग्रिनकार्डको अवधि पूरा गरेपछि नागरिकताका लागि आवेदन दिन सक्नेछन् ।
यो विधयेक पारित भएमा टीपीएसले समेटेका झण्डै ९ हजार नेपालीहरुसहित डाकाले समेटेका गरी झण्डै १० हजार नेपाली लाभान्वित हुनसक्नेछन् ।