विश्वकप एशिया क्षेत्रीय छनोट : चीनमाथि नेपालको ५ रनको जीत
प्रकाशित मिति : फाल्गुन १३, २०७५ सोमबार
आइसीसी महिला टी–२० विश्वकप अन्तर्गत एशिया क्षेत्रीय छनोट प्रतियोगितामा नेपालले चौथो जित निकाल्दा चीनलाई ५ रनको झिनो अन्तरले हराएको छ । चीनमाथि सदैव भारी अन्तरको विजय हात पार्दै आएको नेपालले यसपटकको जितमा भने ५ रनको मात्र सहारा लिन पुग्यो ।
नेपालले दिएको ७८ रनको चुनौती पछ्याउँदै ब्याटिङ गरेको चीनले निर्धारित २० ओभरमा ६ विकेटको क्षतिमा ७२ रन मात्रै बनाउन सक्यो ।चीनका लागि जहाङ मीइले ३३ रन बनाइन् । काइयुन जहोउले १८ रन बनाइन् । बलिङतर्फ नेपालकी सीता रानामगरले तीन विकेट लीइन् ।
त्यस्तै, कविता कुँवरले एक विकेट लीइन् । यसाघि टस हारेर ब्याटिङको निम्तो पाएको नेपालले २० ओभरमा ९ विकेट गुमाएर ७७ रन मात्र बनायो । नेपालको सुरुवात राम्रो थियो । काजल श्रेष्ठ र सीता राना मगरले पहिलो विकेटका लागि ३२ रनको साझेदारी गरिन् । सीता व्यक्तिगत ११ रनमा आउट भैइन् । थप दुई रन जोड्दा काजल पनि १८ रनमा आउट भैइन् । त्यसपछि नेपालले लगातार विकेट गुमायो ।
पाँच खेलमध्ये चार खेलमा जीत, एक खेलमा हार ब्यहोरेको नेपालको ८ अंक छ । तर थाइल्यान्ड पाँच खेलमा शतप्रतिशत जीतसहित १० अंक बनाएर अंक तालिकाको शीर्ष स्थानमा छ ।
पाँचमध्ये चार खेलमा जीत र एक खेलमा हार ब्यहोर्दै ८ अंक नै बनाएको युएइ नेट रनरेटको आधारमा दोस्रो स्थानमा छ । नेपाल तेस्रो स्थानमा छ ।
एशिया क्षेत्र छनोटबाट ग्लोबल छनोटमा जम्मा एक टीममात्र पुग्नेछ । नेपालले अन्तिम खेलमा कुवेतलाई भारी अन्तरले पराजित गरे पनि ग्लोबल छनोटमा पुग्ने सम्भावना न्युन छ । किनभने नेपाल शीर्ष स्थानमा पुग्न आफ्नो खेल जितेर मात्र नभैइ थाइल्यान्ड र युएइको नतिजा पनि आफू अनुकुल आवश्यक पर्छ ।
थाइल्याण्डले हारेर युएइले आफ्नो खेल जिते पनि नेपालको सम्भावना रहँदैन । यी तीन टीममा अंक र नेट रनरेटका आधारमा थाइल्यान्ड सबैभन्दा सहज अवस्थामा छ।