आश्रित दम्पत्तिलाई वर्क परमिट दिने ओबामा नीति खारेज गर्दै ट्रम्प प्रशासन
प्रकाशित मिति : फाल्गुन १०, २०७५ शुक्रबार
झण्डै २ बर्षको ढिलाईपछि ट्रम्प प्रशासनले ग्रिनकार्डका प्रकृयामा रहेका उच्च दक्षता भएका आप्रवासीका आश्रित दम्पत्तिलाई वर्क परमिट स्वीकृतिमा रोक लगाउने नीति कार्यान्वयनमा अगाडि बढेको छ । ट्रम्प प्रशासनको यो कदमले दशौं हजार हाइस्कील्ड भिसा वाहकका दम्पत्तिहरुलाई खतरामा धकेल्ने जनाइएको छ ।
अमेरिकाका कैयन प्रविधि कम्पनीहरुले उच्च दक्षता भएका कामदारहरुलाई रोजगार दिदै आएका छन् । त्यस्ता कामदारहरु दम्पत्ति र छोराछोरीसहित अमेरिका आउने गरेका छन् । दम्पत्तिलाई वर्क परमिट प्रदान नगरिने नीतिले उनीहरुलाई अमेरिकामा जीवन यापनमा असहज अवस्था आउनसक्नेछ ।
प्रस्तावित नीतिलाई पुनरावलोकनका लागि बुधबार ह्वाइटहाउसमा पठाइएको छ । डिपार्टमेन्ट अफ होमल्याण्ड सेक्युरिटी उक्त नीति कार्यान्वयनका लागि सबै प्रकृया पूरा गरेको जनाइएको छ । ह्वाइट हाउसले अब नीतिलाई सरकारका अरु एजेन्सीहरुमार्फत पनि पुनरावलोकन गर्ने जनाइएको छ ।
एचवानबी भिसा वाहकका दम्पत्ति र छोराछोरीहरुलाई एचफोर भिसा प्रदान गरिदै आएको छ । अमेरिकामा हाइटेक भिसामा काम गरिरहेकाहरुका झण्डै १ लाख दम्पत्तिहरुलाई अमेरिकामा वर्क परमिट प्रदान गरिएको छ । उनीहरुमध्ये झण्डै ३० हजार क्यालिफोर्नियामा बस्ने जनाइएको छ ।
सन् २०१५ मा ओबामा प्रशासनले एच फोर वर्क परमिटको सृजना गरेको थियो । उक्त वर्क परमिटले परिवारले ग्रिनकार्ड प्राप्त नगर्दासम्म काम गर्नका लागि अनुमति प्रदान गर्दै आएको थियो । रोजगारमा आधारित ग्रिनकार्ड प्राप्त गर्नका लागि बर्षौ लाग्ने भएकाले उक्त वर्क परमिटले कामदारका परिवारलाई ठूलो सहयोग गर्दै आएको थियो ।
ट्रम्प प्रशासनले यो कार्यक्रम पहिले नै खारेज गर्ने घोषणा गरेको थियो । तर कार्यान्वयनमा भने केही ढिलो भएको थियो ।