बोक्सीको आरोपमा कुटिएकी बौवाबती त्रासमा,रीतपूर्वक जाहेरी नपरेकोभन्दै प्रहरीपछि हट्यो
प्रकाशित मिति : फाल्गुन ५, २०७५ आईतबार
प्रहरीले ‘रीतपूर्वक जाहेरी नपरेको’ भन्दै कारबाही प्रक्रिया अघि नबढाएपछि बोक्सी भन्दै कुटपिट गरिएकी बौवाबती महतो र उनको परिवार त्रासमा बसिरहेका छन् । गाउँमा पुगेको प्रहरी टोली पनि कुटपिट गर्नेहरूलाई सामान्य सोधपुछ गरेर फर्किएपछि उनलाई झन् समस्या भएको हो ।
सिरहाको नरहा गाउँपालिका–३ चन्द्रअयोध्यापुर खोरियाकी ५० वर्षीया बौवाबती महतोलाई २४ माघमा बोक्सी भन्दै छिमेकीले कुटपिट गरेका थिए । स्थानीय अमिरी सदायका १९ वर्षीय छोरा सञ्जीव बिरामी भएपछि बोक्सी लगाएको भन्दै सबै मिलेर गाउँको चौतारामा कुटपिट गरिएको थियो । उनले २६ माघमा मिर्चैयास्थित इलाका प्रहरी कार्यालयका निवेदन दिएकी थिइन् । तर, प्रहरीले ‘रीतपूर्वकको जाहेरी नपरेको’ भन्दै आठ दिन बितिसक्दा पनि कारबाही प्रक्रिया अघि बढाएको छैन ।
गाउँमा पुगेको प्रहरी टोलीले पनि कुटपिट गर्नेहरूकै पक्षमा लागेको पीडित बौवाबतीका पति रामलोचनले बताए । ‘प्रहरीले गाउँमा आएजस्तो मात्र ग¥यो । कुटपिट गर्नेहरूले बौवाबतीलाई बोक्सी नै हो भने । प्रहरीले केही गरेन,’ रामलोचनले भने । प्रहरी केही नगरी फर्किएपछि कुटपिट गर्नेहरू नै बलिया भएको बताए ।
प्रहरीमा निवेदन दिएपछि गाउँलेहरू टाडिएको उनले बताए । ‘गाउँलेहरूको भिडले कुन वेला के गर्ने हुन् भन्ने त्रासमा छौँ,’ रामलोचनले भने, ‘सानासाना पाँच छोराछोरी छन् । उनीहरूलाई घरमा छोडेर काममा जान पनि अप्ठ्यारो भएको छ ।’ नयाँ पत्रिकामा प्रकाशित