अमेरिकी जेलबाट छुट्दा औषतमा १५ हजार डलर धरौटी राख्छन् नेपाली
प्रकाशित मिति : फाल्गुन ४, २०७५ शनिबार
– किशोर पन्थी
अमेरिकी अध्यागमन जेलबाट छुट्दा नेपालीहरुले औषतमा १५ हजार अमेरिकी डलर धरौटी राख्ने गरेको तथ्यांक सार्वजनिक भएको छ । एक्ज्युकेटिभ अफिस फर इमिग्रेशन रिभ्युको तथ्यांक अनुशार गैरकानुनी रुपमा सिमा प्रवेश गर्ने क्रममा अध्यागमन जेलमा परेका नेपालीहरुले औषतमा १५ हजार अमेरिकी डलर धरौटी राख्ने गरेका छन् ।
आर्थिक बर्ष सन् २०१९ को तथ्यांक हेर्दा अमेरिकी अध्यागमन जेलबाट धरौटीमा छुट्दा नेपालीले बुझाउने धरौटी रकम विगतको तुलनामा ह्वात्तै बढेको छ । आर्थिक बर्ष २०१७ मा औषतमा नेपालीले बुझाउने धरौटी रकम १० हजार अमेरिकी डलर रहेकोमा २०१८ र २०१९ मा औषतमा १५ हजार पुगेको हो ।
विगत १८ बर्षको तथ्यांक हेर्दा भने औषतमा नेपालीहरुले बुझाउने धरौटी रकम १० हजार अमेरिकी डलरको हाराहारीमा छ । दलाललाई लाखौं रकम बुझाएर मेक्सिकोको बाटोहुँदै गैरकानुनी रुपमा अमेरिका छिर्ने क्रममा सिमाक्षेत्रमा समातिएका नेपालीहरुमध्ये अधिकांश धरौटीमा छुट्दै आएका छन् ।
सन् २००१ मा नेपालीले बुझाउने औषत धरौटी रकम ३७५० डलर रहेको थियो । सन् २००२ मा बढेर औषतमा ६५ सय डलर पुग्यो । सन् २००३ मा २५ सय, सन् २००४ देखि सन् २००७ सम्म ५ हजार, सन् २००८ मा ४ हजार, सन् २००९ मा ६ हजार डलर नेपालीले बुझाउने औषत धरौटी रकम रहेको थियो ।
त्यस्तै सन् २०१० मा ४ हजार, सन् २०११ मा ५ हजार, सन् २०१२ मा ७५ सय, सन् २०१३ मा ८ हजार, सन् २०१४ मा ७२५० डलर नेपालीले धरौटी बुझाउने औषत रकम रहेको थियो । त्यस्तै सन् २०१५ मा ७५ सय, सन् २०१६ मा १० हजार हुँदै अहिले औषत धरौटी रकम १५ हजार अमेरिकी डलर पुगेको छ ।
अमेरिकी अध्यागमन अदालतमा मुद्दा जारी रहँदा नेपालीहरु धरौटीमा रिहा हुने गरेका छन् । मुद्दाको टुंगो लागिसकेपछि भने धरौटी रकम फिर्ता लिन पाइन्छ । तर जेलमा रहेको बखत दोश्रो व्यक्ति मार्फत धरौटी राख्नुपर्ने भएकाले धरौटी रकम फिर्ता गर्ने क्रममा भने अमेरिकामा थुप्रै नेपालीहरु ठगिने गरेका छन् ।
हामीले नेपालीले बुझाउने बोण्ड रकमका बारेमा श्रृंखलाबद्ध समाचार प्रकाशित गर्दैछौं । खसोखास हेर्दै गर्नुहोला ।