एसाइलम मुद्दाको अवस्था अनलाइनमा हेर्न मिल्ने युएससीआइएसको औपचारिक घोषणा
प्रकाशित मिति : माघ १४, २०७५ सोमबार
अमेरिकी सरकारको सिटिजनसिप एण्ड इमिग्रेशन सर्भिसेज युएससीआईएसले अब एसाइलमका आवेदनको अवस्था पनि अनलाइनमार्फत हेर्न सकिने व्यवस्था गरिएको घोषणा गरेको छ । सोमबार युएससीआईएसले गरेको घोषणा अनुशार अब युएससीआईएसमा पेन्डिङ अवस्थामा रहेका आवेदनको अवस्था अनलाइनमार्फत हेर्न सकिने भएको छ ।
युएससीआईएसको औपचारिक घोषणा अगाडि नै शुक्रबार खसोखासले यस सम्बन्धमा समाचार प्रकाशित गरेको थियो ।
अमेरिकी अध्यागमन अदालतमा पेन्डिङ अवस्थामा रहेका मुद्दाको अवस्था भने अनलाइनमार्फत हेर्न नसकिने जनाइएको छ । युएससीआईएसका निर्देशक एल फ्रान्सिस सिस्नाका अनुशार अब आवेदकले आफ्नो एसाइलमको आवेदनको अवस्था सातै दिन र चौबीसै घण्टा अनलाइनमार्फत हेर्न सक्नेछन् ।
आफ्नो आवेदनको अवस्थाबारे थाहा पाउन यहाँ क्लीक गर्नुहोला ।
यसभन्दा अगाडि एसाएलमका आवेदनको अवस्था अनलाइनमार्फत हेर्न सकिने व्यवस्था थिएन । आवेदकले आफ्नो आवेदनबारे बुझ्नुपरेमा एसाइलम अफिसमा गएर वा फोन, फ्याक्स तथा इमेल पठाएर मात्र बुझ्न सकिने प्रावधान रहेको थियो । सरोकारवाला र गैर नाफामुलक संस्थाहरुले यो प्रकृया निकै झन्झटिलो रहेको बताएपछि अनलाइनमार्फत आवेदनको अवस्था हेर्न सकिने व्यवस्था गरिएको युएससीआईएसले जनाएको छ ।
यदि तपाईले युएससीआईएसमा एसाइलमको आवेदन फाइल गर्नुभएको छ भने तपाईले सामान्यतया ० वा २ बाट सुरु हुने ९ डिजिटको एलियन नम्बर सहित रिसिप्ट प्राप्त गर्नुहुनेछ । त्यस्तै तपाईले जेडबाट सुरु हुने १० नम्बरको रिसिप्ट नम्बर पनि प्राप्त गर्नुहुन्छ । तपाईले त्यो रिसिप्ट नम्बर अनलाइनमा हालेर आफ्नो केसको अवस्था थाहा पाउन सक्नुहुनेछ ।
रिसिप्ट नम्बर हालेपछि तपाईले आफ्नो केसको अवस्थामात्र होइन, तपाईले चाल्नुपर्ने कदमबारेपनि जानकारी प्राप्त हुनेछ । वर्क परमिटका लागि एसाइलम क्लकबारे जानकारी, अन्तरवार्ताको मिति तय भएको भएमा त्यसबारे जानकारी, अन्तरवार्ता भइसकेको भए त्यसबारे जानकारी वा निर्णय हुन बाँकी रहेको भए त्यसबारे जानकारी पनि प्राप्त गर्न सकिनेछ ।