सर्बोच्चको मौनता, अमेरिकामा रहेका ६० नेपाली बचे तत्काल देशनिकालाको डरबाट
प्रकाशित मिति : माघ ८, २०७५ मंगलबार
बाल्यकालमा अमेरिका आएका कागजपत्रविहिनहरुलाई संरक्षण प्रदान गरिररहेको डाका कार्यक्रमबारे मंगलबार सर्बोच्च अदालतले निर्णय लिने अपेक्षा गरिएपनि कुनै निर्णय नलिएका कारण कम्तीमा ६० जना नेपालीहरु तत्काल देशनिकालाको डरबाट मुक्त भएका छन् । सर्बोच्चको मौनता कारकाण डाकाको संरक्षण अवधि केही महिनाका लागि लम्बिएको छ । डाकाबारे सर्बोच्चले कुनै फैसला नलिनुलाई ट्रम्प प्रशासनको पराजयका रुपमा हेरिएको छ ।
सर्बोच्च अदालतले कुनै फैसला नगरेपछि डाका कार्यक्रमले समेटेका झण्डै ७ लाख कागजपत्रविहिनहरु अरु केही महिना देशनिकालाको डरविना अमेरिकामा रहन पाउनेछन् । जसमा ६० जना नेपालीहरु समेत रहेका छन् । उनीहरु बाल्यकालमा अमेरिका आएर कागजपत्रविहिन भएका थिए ।
राष्ट्रपति डोनाल्ड ट्रम्पले डाका कार्यक्रमलाई पर्खाल निर्माणका लागि सौदाबाजीको रुपमा उपयोग गरिरहेका छन् । उनले डाकाले समेटेकाहरुलाई अरु तीनबर्ष संरक्षण प्रदान गर्ने शर्तमा डेमोक्र्याट्सहरुलाई पर्खाल निर्माणको एजेण्डामा सहमतिमा ल्याउन प्रयास गरेका थिए ।
न्यायाधिसहरुले डाकाका सन्दर्भमा कम्तीमा आगामी समरसम्म कुनै सुनुवाई नगर्ने देखिएको छ । डेमोक्र्याट्सहरुले डाका कार्यक्रमले समेटेकाहरुलाई अमेरिकी नागरिकताको बाटोमा लैजानुपर्ने राय व्यक्त गर्दै आएका छन् ।