डाका र टीपीएस हुनेलाई नागरिकताको बाटोमा लैजाने प्रस्ताव गर्दै ट्रम्प, विशेष सम्बोधन ४ बजे
प्रकाशित मिति : माघ ५, २०७५ शनिबार
आज दिउसो ४ बजे अमेरिकी राष्ट्रपति डोनाल्ड ट्रम्पले गर्ने सम्बोधनमा सिमानामा पर्खाल लगाउने विषयमा डेमोक्र्याटहरु सहमत भएमा आफूहरु डाका र टीपीएस होल्डरलाई अमेरिकी नागरिकताको बाटोमा लैजान तयार रहेको प्रस्ताव गर्ने जनाइएको हो । बाल्यकालमा अमेरिकामा आएका कागजपत्रविहिनहरुलाई अमेरिकामा डिफर्ड एक्सन फर चाइल्डहुड एराइभल अर्थात् डाका कार्यक्रममार्फत संरक्षण प्रदान गरिदै आएको छ ।
सम्बोधनका क्रममा ट्रम्पले सिमानामा पर्खाल बनाउन ५ दशमलव ७ बिलियन डलरको प्रस्तावमा डेमोक्र्याटहरुलाई सहमत गराउन त्यसको सट्टामा डाका र टीपीएसले समेटेकाहरुलाई अमेरिकी नागरिकताको बाटोमा लैजाने प्रस्तावमा सहमति जनाउनसक्ने जनाइएको छ । अमेरिकामा झण्डै ९ हजार नेपालीहरु टीपीएसबाट संरक्षित रहेका छन् ।
आजको सम्बोधनमा ट्रम्पले संकटकालको घोषणा भने नगर्ने जनाइएको छ । अमेरिकी सरकार शटडाउनको २९ औं दिन पुग्दा राष्ट्रपति ट्रम्पले विशेष सम्बोधन गर्न लागेका हुन् । तर ट्रम्पको सम्बोधनले भने सरकार शटडाउनको अवस्था अन्त्य गर्नेमा भने आशंका रहेको जनाइएको छ ।