ट्रम्पको कार्यकारी आदेशपछि युएससीआईएस बन्द
प्रकाशित मिति : पुस ९, २०७५ सोमबार
अमेरिकी राष्ट्रपति डोनाल्ड ट्रम्पले कार्यकारी आदेश जारी गर्दै सोमबार अमेरिकाका सबै संघीय विभाग र एजेन्सीहरु बन्द हुने घोषणा गरेपछि युएससीआईएसका सबै कार्यालयहरु बन्द भएका छन् । ट्रम्पको कार्यकारी आदेशमा सोमबार सबै संघीय कर्मचारीहरुलाई बिदा दिइएको छ ।
डिसेम्बर २४ का लागि तय भएका सबै नागरिकता वितरण समारोहहरु, अन्तरवार्ता र अप्वाइन्टमेन्टहरु अर्को मितिमा तय गरिने युएससीआईएसले जनाएको छ । सोमबारका लागि बायोमेट्रिक अप्वाइन्टमेन्ट रहेका आवेदकहरुले तीनसाताभित्र नयाँ मितिका लागि सुचना प्राप्त गर्ने युएससीआईएसले जनाएको छ ।
युएससीआईएसको सम्पर्क केन्द्र भने न्युयोर्क समय अनुशार राती ९ बजेसम्म खुल्ला रहनेछ । तर प्रत्यक्ष सहयोग भने सिमित गरिएको छ । अमेरिकी अध्यागमन सेवाबारे सामान्य जानकारी र आफ्नो आवेदनबारे कुनै जिज्ञासा भएमा युएससीआईएसको आधिकारिक वेवसाइट हेर्न सकिनेछ ।
क्रिसमसको पूर्वसन्ध्यामा विदाको घोषणा गरिएकाले अब सबै संघीय कार्यालयहरु बुधबारमात्र खुल्नेछन् । शनिबारदेखि सुरु भएको लामो सप्ताहन्त यसपटक ४ दिन कायम रहनेछ ।