अमेरिकी नागरिकसँग विहे गरेर ग्रिनकार्ड लिन थप सहज, अन्तरवार्ता छुट हुनसक्ने
प्रकाशित मिति : मंसिर २९, २०७५ शनिबार
अब अमेरिकी नागरिकसँग ग्रिनकार्ड लिन पहिलेको तुलनामा केही सहज हुने भएको छ । अमेरिकी सरकारको युएससीआईएसले अमेरिकी नागरिकसँग विवाह गरेर ग्रिनकार्ड लिनेहरुको सन्दर्भको एउटा प्रकृयाको पुनारावलोकन गरेको छ । नयाँ नीति डिसेम्बर १० देखि लागु गरिएको छ ।
सामान्यतया अमेरिकी नागरिकसँग विहे गरेर ग्रिनकार्ड लिनेहरुका लागि २ बर्षका लागि शर्तसहितको ग्रिनकार्ड प्रदान गरिदै आएको छ । त्यसपछि उनीहरुले विवाह नक्कली नरहेको र अमेरिकी कानुनको उल्लंघन नहुने पुष्टी गरेपछि १० बर्षको ग्रिनकार्ड प्रदान गरिन्छ ।
शर्तसहितको दुईबर्षे ग्रिनकार्डबाट पूर्ण ग्रिनकार्ड लिने प्रकृयामा फर्म आई ७५१ भर्न जरुरी हुन्छ । जुन प्रकृयाका क्रममा युएससीआईएसका अधिकारीहरुले प्राय अन्तरवार्ता लिएरमात्र स्थायी ग्रिनकार्ड प्रदान गर्दै आएका छन् । अन्तरवार्ताका क्रममा विवाह गर्नेले आफ्नो विवाह सक्कली भएको पुष्टी गर्न सक्नुपर्छ ।
यो अन्तरवार्ताका क्रममा जोडीलाई अलग अलग राखेर लगातार प्रश्नहरु सोधिने भएकाले आवेदकहरु आत्तिने समेत गर्दै आएका छन् । तर युएससीआईएसले जारी गरेको नयाँ नीति अनुशार अब युएससीआईएसका अधिकारीहरुले अन्तरवार्ता लिन नपर्ने कुराको समेत निर्णय गर्नका लागि थप मार्गदर्शनहरु दिइएको छ ।
यदि विवाह नक्कली नभएको पुष्टी गर्ने प्रयाप्त कागजात भएको खण्डमा र त्यसबाट युएससीआईएसका अधिकारी सन्तुष्ट भएको खण्डमा दुईबर्षे ग्रिनकार्डबाट स्थायी ग्रिनकार्ड लिनका लागि आवेदकले अन्तरवार्ता दिनुनपर्ने भएको छ । त्यस्तै फर्म आई ७५१ र अन्य कागजातमा विवाह नक्कली भएको कुनै संकेत नभएको खण्डमा अधिकारीले अन्तरवार्ता विना नै स्थायी ग्रिनकार्ड प्रदान गर्न सक्नेछन् ।
डिसेम्बर १०, २०१८ पछि प्राप्त आवेदनहरुको सन्दर्भमा युएससीआईएसका अधिकारीहरुले पहिले नै मुख्य आवेदकसँग अन्तरवार्ता लिइसकेको भएमा पनि अधिकारीले स्थायी ग्रिनकार्डका लागि अन्तरवार्ता छुट दिन सक्नेछन् । त्यस्तै विवाहको सन्दर्भमा अन्तरवार्ताबाट प्रष्ट पार्नुपर्ने कुनै जटिल विषय नभएको खण्डमा पनि अन्तरवार्ता छुट दिइनेछ ।
राष्ट्रिय सुरक्षा र जालसाजीसँग सम्बन्धित मामला भएमा भने त्यस्तो आवेदन जालसाजी जाँचबुझ र राष्ट्रिय सुरक्षा निकायमा पठाइने युएससीआईएसले जनाएको छ । युएससीआईएसको नयाँ निर्देशिकापछि वास्तविक विवाह गर्नेहरुलाई ग्रिनकार्डका लागि सहज हुने भएको छ ।