एक किलो नुनको ७० रुपैयाँ !
प्रकाशित मिति : मंसिर २४, २०७५ सोमबार
हुम्लामा नुनको भाउ महंगिएको छ । हुम्लाको सर्केगाड गाउँपालिकाका स्थानीयवासी महँगो मूल्य तिरेर आयोडिनयुक्त नुन खान बाध्य भएका छन् ।
सर्केगाड गाँउपालिकाको डिपोले रु १० मा बिक्री वितरण गर्दै आएको भएतापनि यतिबेला उक्त डिपोमा नुनको अभाव भएका कारण सो गाउँपालिकामा रहेका आठवटै वडाका स्थानीयवासीले एक पोका नुनको रु ७० तिरेर खानु परेको उक्त गाउँपालिका–४ निवासी कृष्ण शाहीले बताए ।
जिल्ला सदरमुकाम सिमकोटबाट खच्चरद्वारा बोकेर ल्याएको नुनको मूल्य गाउँमा पुग्दा रु ७० तिरेर खानु परेकोमा शाहीले गुनासो गरे ।
सर्केगाड डिपोमा नुनका लागि ठेकेदारले यतिबेला नुन पु¥याउन ढिलाइ गरेका कारण खाने नुनको समस्या भएको सोही गाउँ निवासी कवीन्द्र शाहीले बताए ।
कसैले दुई दिनको पैदलयात्रा लगाएर जिल्ला सदरमुकाम सिमकोटबाट आफैँले बोकेर ल्याउने गरेका छन् । सिमकोट डिपोमा नुनको समस्या नभएता पनि सर्केगाड गाउँपालिकामा रहेको खाद्य डिपोमा यति बेला नुनको अभाव भएको छ ।
सर्केगाड गाउँपालिकालाई उपशाखा तोकिएता पनि त्यस क्षेत्रका सर्वसाधारण भने यतिबेला मर्कामा परिरहेका छन् ।